غریبوں کا مرنا آسان جینا مشکل بنادیا گیا ہے ۔ سراج الحق

پی ٹی آئی پہلے بل جلاتی تھی اب 22کروڑ عوام کے دل جلا رہی ہے
اس دور میں کسی کو  ایک پل کا سکھ نصیب نہیں ہوا
قوم نے سب کو آزما لیا اب جماعت اسلامی بہترین آپشن ہے
امیر جماعت اسلامی پاکستان کا  تقریب ختم بخاری سے خطاب کرتے

تیمرگرہ دیر پائیں (ویب ڈیسک)

امیر جماعت اسلامی پاکستان سینیٹر سراج الحق نے کہا ہے کہ نئے پاکستان میں غریب کا مرنا آسان جینا مشکل بنادیا گیا، پی ٹی آئی پہلے بل جلاتی تھی اب 22کروڑ عوام کے دل جلا رہی ہے۔ اس دور میں کسی کو  ایک پل کا سکھ نصیب نہیں ہوا۔۔ان خیالات کا اظہار انہوں نے جامع احیاء  العلوم کی تقریب ختم بخاری سے بلامبٹ تیمرگرہ دیر پائیں میں خطاب کرتے ہوئے کیا۔انھو ں نے کہا کہ غذائی اجناس کے ہوتے ہوئے خیر و برکت بھی اٹھ گئی۔ آئی ایم ایف کا قرض ملک اور عوام کے لیے سب سے بڑا مرض بن چکاہے۔ اشیائے خوردونوش کی قیمتوں میں ہوشربا اضافہ نے عوام کو دن میں تارے دکھا دیے ہیں۔ مغرب کے فنڈ سے چلنے والی این جی اووز مدارس کا امیج خراب کرنے میں دن رات مصروف ہیں۔ حکومت اس بات کا فوری نوٹس لے۔تمام مسائل کا حل اللہ کے نظام کے نفاذ میں موجود ہے۔ جماعت اسلامی اللہ اور اس کے رسول صلی اللہ وعلیہ وسلم کے نظام کی جدوجہد کر رہی ہے ۔قوم نے سب کو آزما لیا اب جماعت اسلامی بہترین آپشن ہے  ۔سراج الحق نے کہا کہ مہنگائی کے سونامی نے لوگوں کو رونے پر مجبور کردیاہے۔ وفاقی ادارہ شماریات نے جو اڑھائی سالہ رپورٹ پیش کی ہے اس کے مطابق دال ماش کی قیمت 107 ، آٹا 10 ، چینی 38 ، گھی 100 ، دال مونگ ، چنا 38 ، گڑ 45 ، بکرے کا گوشت 216 ، گائے کا گوشت 100 ، برائلر 102 روپے کلو جبکہ دودھ، دھی، انڈوں، سبزیوں کی قیمتوں میں بھی ہوشربا اضافے سے عوام کے ہوش اڑ گئے ہیں۔ نئے پاکستان میں غریب کا مرنا آسان جینا مشکل بنادیا گیاہے۔ سینیٹر سراج الحق نے کہاکہ ملک میں آٹا ، شوگر ، لینڈ ، ڈرگ ، چینی ، پیٹرول اور گھی مافیا اپنے عروج پر ہے۔ وزیر اعظم کے بیانات کہ ”مہنگائی و ذخیرہ اندوزمافیا کو نہیں چھوڑوں گا ”صرف دعوے ثابت ہوئے ہیں ان کا حقیقت سے کوئی تعلق نہیں ہے۔اب تک مافیاز عوام کی جیبوں پر اربوں روپے کا ڈاکہ ڈال چکے ہیں۔ انہوں نے کہاکہ بجلی و پٹرولیم مصنوعات کی قیمتوں میں مسلسل اضافے سے عوام کے اوسان خطا ہو چکے ہیں۔ بجلی کے بل بڑھنے سے عوام کے دل جل رہے ہیں۔ انہوں نے کہاکہ اڑھائی برسوں میں ملکی و غیر ملکی قرضوں میں بے تحاشا اضافہ ہواہے۔ حکومت نے دو ہزار ارب روپے کے نئے کرنسی نوٹ جاری کر مہنگائی کی طرف ایک اور قدم اٹھایا ہے ۔امیر جماعت نے کہا کہ پہلے سالانہ بجٹ آتا تھا اب روزانہ بجٹ آتا ہے ۔ سرکاری اعدادوشمار کے مطابق اب تک اشیائے ضروریہ کی قیمتوں میں 70%اضافہ ہو چکا ہے۔ پورے ملک میں مافیاز اور بد حالی کا راج ہے۔ انہوں نے کہاکہ اللہ تعالی نے پاکستان کو بہت ساری نعمتوں اور وسائل سے نوازا ہے ۔بلوچستان پاکستان کا معدنی وسائل سے مالا مال صوبہ ہے لیکن حکومتوں کی نااہلی ، اقرباپروری ، وسائل کی غیر منصفانہ تقسیم سے بلوچستان کے عوام کو محرومیاں دیکھنے کو ملی ہیں۔ انہوں نے کہاکہ بلوچستان کو این ایف سی ایوارڈ میں اس کا حصہ دیاجائے اور وہاں کے عوام کو تعلیم ، صحت ، روزگار ، سماجی بہبود کے منصوبوں کے ثمرات دیے جائیں۔ بلوچستان پاکستان کی معاشی و جغرافیائی حب ہے۔ سینیٹر سراج الحق نے کہاکہ جماعت اسلامی ملک میں قرآن و سنت کے نظام کے نفاذ ، آئین و قانون کی حکمرانی ، عوام کے حقوق کی پاسداری اور ان کے سماجی معاشی مسائل کے حل کے لیے میدان عمل میں ہے۔ 26 فروری کو مہنگائی و بے روزگاری کے خلاف بہاولپور میں عظیم الشان جلسہ کرے گی۔ جماعت اسلامی اقتدار میں آکر اشیائے خوردونوش کی قیمتوں میں خاطر خواہ کمی کرے گی اور عوام کو تعلیم ، صحت کی سہولیات ان کی دہلیز پر مہیا کرے گی اور ملک کو اسلام اور خوشحالی کا گہوارہ بنائے گی۔ امیر جماعت نے حکومت سے مطالبہ کیا کہ ملک میں یکساں نظام تعلیم رائج کیا جائے ، عربی زبان کو لازمی مضمون کے طور پڑھایا جائے ، مدارس کے 31 لاکھ طلبہ کے لیے بجٹ مختص کیا جائے ۔

Editor

Next Post

کورونا وائرس، دنیا بھر میںہلاکتیں2472298ہو گئیں

اتوار فروری 21 , 2021
کیسز11کروڑ16لاکھ48ہزارسے متجاوز، 8کروڑ 68لاکھ 15ہزار مریض شفایاب امریکہ میں اموات 509875 ،بھارت میں156339ہو گئیں نیویارک ،نئی دہلی ،ماسکو ،میڈرڈ (ویب ڈیسک) مہلک وبا کورونا وائرس کے باعث دنیا بھر میںہلاکتیں2472298ہو گئیں ، کیسز11کروڑ16لاکھ48ہزارسے تجاوز کر گئے ۔غیرملکی خبررساں ادارے کے مطابق امریکہ کورونا سے متاثرہ ممالک میں پہلے نمبر پر […]