اپوزیشن جماعتیں الیکشن جیتنے کیلئے ہر حربہ استعمال کررہی ہیں،اراکین اسمبلی سے ملاقاتوں میں گفتگو

اسلام آباد (ویب ڈیسک)

وزیر اعظم عمران خان نے کہا ہے کہ سینیٹ انتخابات میں کامیابی حاصل کریں گے، اپوزیشن جماعتیں سینیٹ الیکشن جیتنے کے لیے ہر حربہ استعمال کررہی ہیں۔ بدھ کو پارلیمنٹ ہائوس اسلام آباد میں وزیر اعظم عمران خان نے مسلسل دوسرے روز بھی تحریک انصاف کے ارکان قومی اسمبلی سے ملاقاتوں کا سلسلہ جاری رکھا، اس موقع پر وزیراعلیٰ پنجاب عثمان بزدار اور وزیر خزانہ حفیظ شیخ بھی موجود تھے۔ملاقاتوں کے دوران وزیر اعظم عمران خان نے کہا کہ اپوزیشن جماعتیں سینیٹ الیکشن جیتنے کے لیے ہر حربہ استعمال کررہی ہیں، میں اسی لیے شفاف انتخابات کیلئے اوپن ووٹنگ کا حامی تھا، ہمارے اراکین سے رابطے ہورہے ہیں مگر ہم متحد ہیں،اپوزیشن کی جانب سے پیسہ اور لالچ کے باوجود سینیٹ انتخابات میں کامیابی حاصل کریں گے۔انہوں نے کہا کہ ہماری حکومت کی ترجیح عام آدمی اور پسماندہ علاقے ہیں، پہلی مرتبہ پسماندہ علاقوں کو زیادہ ترقیاتی منصوبے دیے جارہے ہیں،عوامی نمائندوں کی جانب سے اٹھائے گئے عوامی مسائل حل کریں گے۔