اسلام آباد(صباح نیوز)
وفاقی دارالحکومت اسلام آباد کے پمز ہسپتال کے ڈاکٹرز اور طبی عملے سمیت 18افراد میں کورونا کی تشخیص ہو گئی ہے جس کے بعد ایم سی ایچ وارڈ کو سیل کر دیا گیا ہے۔مگل کوکورونا وائرس سے متاثر ہونے والی پمز ہسپتال کی ڈاکٹر ثروت نے بتایا ہے کہ میرے ایک ساتھی کا تین دن پہلے کورونا ٹیسٹ پازیٹو آیا تھا جس کے بعد مجھ میں بھی وائرس کی علامات ظاہر ہوئیں۔ڈاکٹر ثروت نے بتایا کہ آج صبح میرے کورونا وائرس ٹیسٹ کی رپورٹ مثبت آئی ہے۔ ایک ڈاکٹر کا کورونا ٹیسٹ پازیٹو آنے پر درخواست کی تھی کہ ایم سی ایچ وارڈ سیل کر دیں۔انہوں نے الزام عائد کیا کہ یہ انتظامیہ کی نااہلی اور ناقص مینجمنٹ کی وجہ سے ہوا۔ ہمیں مجبورا ڈیوٹی پر آنا پڑا اور دوسرے لوگ ہماری وجہ سے وائرس کا شکار ہوئے۔ادھر پمز ہسپتال میں بچوں کے سرجیکل سیکشن میں بھی 10افراد میں کورونا مثبت آیا ہے۔ متاثرہ افراد میں دو ڈاکٹر، ایک میل نرس، 5او ٹی سٹاف، ایک وارڈ بوائے اور ایک سینٹری ورکر شامل ہیں۔ ذرائع کے مطابق بچوں کے سرجیکل سیکشن میں تاحال حفاظتی انتظامات نہیں کیے گئے ہیں۔
