طالبان کی نیت پر شک کی کوئی وجہ نہیں، ڈی جی آئی ایس پی آر

طالبان کی نیت پر شک کی کوئی وجہ نہیں،ڈی جی آئی ایس پی آر

قومی مفاد کیلئے طالبان کے ساتھ مسلسل رابطے میں ہیں

بھارتی میڈیا جعلی خبروں  اور جھوٹی کہانیوں پر پروان چڑھتا ہے، میجر جنرل بابر افتخار کا انٹرویو

راولپنڈی (ویب ڈیسک)

پاک فوج کے شعبہ تعلقات عامہ(آئی ایس پی آر)کے ڈائریکٹرجنرل میجر جنرل بابر افتخار نے کہا ہے کہ طالبان کی نیت پر شک کی کوئی وجہ نہیں، قومی مفاد کیلئے طالبان کے ساتھ مسلسل رابطے میں ہیں۔ ایک انٹرویو میںترجمان پاک فوج نے مزید کہاکہ  طالبان نے کئی مواقع پر دہرایا ہے کہ کسی گروہ یا دہشت گرد تنظیم کو کسی ملک بشمول پاکستان کے خلاف کسی دہشت گرد سرگرمی کے لیے افغان سرزمین استعمال کرنے کی اجازت نہیں دی جائے گی۔ انہوں نے کہا کہ ہمارے پاس ان کی نیت پر شک کرنے کی کوئی وجہ نہیں ہے اور اسی لیے ہم ان سے مسلسل رابطے میں ہیں تاکہ اپنے قومی مفاد کا تحفظ کر سکیں۔میجر جنرل بابر افتخار کا کہنا تھا کہ بارڈر مینجمنٹ میں مسلسل بہتری لائی جا رہی ہے اور مستقبل قریب میں اس کو مکمل طور پر محفوظ بنا دیا جائے گا۔ ہمارا ہمیشہ سے مقصد سرحد کے اس طرف والے حصے پر بہتر مینجمنٹ رہا ہے۔ پاکستان افغان سرحد پر باڑ لگانا اس خطے کی ہیئت اور دوسری مشکلات کی وجہ سے ایک بڑی ذمہ داری تھی۔ان کا کہنا تھا کہ تمام تر مشکلات کے باوجود پاکستان نے بارڈر کے 90 فیصد حصے پر باڑ لگانے کا کام مکمل کر لیا ہے۔ بارڈر مینجمنٹ میں مسلسل بہتری ہو رہی ہے اور ہم پر امید ہیں کہ مستقبل قریب میں اس کو مکمل طور پر محفوظ بنا دیا جائے گا۔طالبان کے ہمراہ افغانستان میں لڑنے کے حوالے سے بھارتی میڈیا پر چلنے والی خبروں کے بارے میں سوال پر جواب دیتے ہوئے ڈی جی آئی ایس پی آر کا کہنا تھا کہ جس طریقے سے بھارتی میڈیا نے طالبان کے پنجشیر پر حملے کے حوالے سے خود کو پیش کیا ہے وہ اس بات کی کافی شہادت ہے کہ ان کا میڈیا جعلی خبروں اور جھوٹی گھڑی گئی کہانیوں پر پروان چڑھتا ہے.