پنجاب میں چھاپوں اور گرفتاریوں کے خلاف فلور ملز کی ہڑتال، سستا آٹا ناپید، قیمت بڑھ گئی ضلعی انتظامیہ نے آٹا کی ترسیل کا 30سالہ آٹا ڈیلرز سپلائی نظام ختم کردیا گیا، صوبے میں سستے آٹے کی فراہمی بند

لاہور، راولپنڈی، فیصل آباد، گوجرانوالہ، ڈی جی خان سمیت صوبے کے تمام بڑے شہروں میں آٹا سپلائی بند ہونے سے عوام کو پریشانی کا سامنا

فلور ملز مالکان نے راولپنڈی کے 100سیل پوائنٹ پر سستے آٹے کی فراہمی بند کردی ، عوام کو 10کلو آٹا 490روپے اور 20کلو 980روپے میں دستیاب نہیں

انتظامیہ فلور ملز میں چھاپے اور گرفتاریاں و مقدمات کا سلسلہ بند کرے، ہر فلور مل کو چور کہنا اور سمجھنا بیورو کریسی اور حکومت کی غلطی ہے: رضا احمد شاہ ، عاصم رضا

 پنجاب بھر کی فلور ملز کا اجلاس  جمعرات کو  لاہور میں طلب کر لیا گیا ہے، جس میں بڑے فیصلے کریں گے، چیئرمین فلور ملز ایسوسی ایشن

لاہور (ویب نیوز)

پنجاب میں فلور ملز مالکان نے فلور ملوں میں چھاپوں، گرفتاریوں اور گندم پر قبضے کے خلاف ہڑتال کردی، جس کے بعد سستا آٹا نظام مفلوج ہوکر رہ گیا۔ضلعی انتظامیہ کی جانب سے آٹا کی ترسیل کا 30سالہ آٹا ڈیلرز سپلائی نظام ختم کردیا گیا ہے، جس پر فلور ملز مالکان کی ہڑتال کے بعد فلور ڈیلرز ایسوسی ایشن بھی ہڑتال پر چلی گئی۔ اس تعطل کی وجہ سے صوبے میں سستے آٹے کی فراہمی بند ہو گئی۔ذرائع کے مطابق لاہور، راولپنڈی، فیصل آباد، گوجرانوالہ، ڈی جی خان سمیت صوبے کے تمام بڑے شہروں میں آٹا سپلائی بند ہونے سے عوام کو پریشانی کا سامنا ہے۔فلور ملز مالکان نے راولپنڈی کے 100سیل پوائنٹ پر سستے آٹے کی فراہمی بند کردی ہے، جس کے بعد اب عوام کو 10کلو آٹا 490روپے کلو اور 20کلو آٹے کا تھیلا 980روپے میں دستیاب نہیں ہو رہا۔ بحران کی وجہ سے مارکیٹ میں 15کلو کا آٹے کا تھیلا 1200روپے جبکہ 20کلو کا تھیلا 1550روپے میں فروخت ہو رہا ہے۔فلور ملز مالکان ایسوسی ایشن کے صدر رضا احمد شاہ نے مطالبہ کیا ہے کہ انتظامیہ فلور ملز میں چھاپے اور ہونے والی گرفتاریاں و مقدمات کا سلسلہ بند کرے۔دوسری جانب فلور ملز ایسوسی ایشن کے چیئرمین عاصم رضا نے حکومتی اقدامات پر تنقید کرتے ہوئے کہا ہے کہ ہر فلور مل کو چور کہنا اور سمجھنا بیورو کریسی اور حکومت کی غلطی ہے۔ انہوں نے کہا کہ پنجاب بھر کی فلور ملز کا اجلاس آج (جمعرات کو) لاہور میں طلب کر لیا گیا ہے، جس میں بڑے فیصلے کریں گے۔ انہوں نے کہا کہ کمشنرز، ڈپٹی کمشنرز اور اسسٹنٹ کمشنرز کے بلاجواز چھاپوں کو روکا جائے۔علاوہ ازیں سستے آٹے کی فراہمی کے سلسلے میں پیدا ہونے والے بحران پر قابو پانے کے لیے فلور ملز ایسوسی ایشن کی قیادت اور محکمہ خوراک کے سینئر حکام کے درمیان آج ملاقات متوقع ہے۔