- جو جلسہ کرنا چاہ رہے ہیں ان کا حق ہے مگرعام شہریوں کے حقوق بھی متاثر نہیں ہونے چاہئیں، جسٹس عامرفاروق
- ہائی ویز اور موٹرویز کو بند کردیں گے توتجارت بھی متاثر ہو گی، اسلام آباد میں غیر ملکی بھی ہیں، ڈپلومیٹک موومنٹ بھی متاثر ہوتی ہے
- ہائی ویز اور موٹرویز پر کنٹرول فیڈریشن کا ہے، یہ بات واضح ہے کہ فیڈریشن اس متعلق ڈائریکشن دے سکتی ہے ،ریمارکس
- کنٹینرز کو راستوں میں کھڑا کیا گیا ہے، جس سے مشکلات ہیں ،وکیل تاجر
- دھرنے اور جلسے کے این او سی کے لئے پی ٹی آئی کی درخواست بھی زیرالتوا ہے،ایڈووکیٹ جنرل اسلام آباد
- ہائی ویز اور موٹرویز پر ٹریفک روانی یقینی بنانے کے احکامات جاری کئے جائیں،وکیل درخواست گزار
اسلام آباد (ویب نیوز)
چیف جسٹس اسلام آباد ہائیکورٹ جسٹس عامرفاروق نے کہا ہے کہ یہ کسی کا حق نہیں ہے کہ وہ کہہ دے کہ موٹروے پردھرنا دے گا اوروہاں کھڑا ہوجائے، جو جلسہ کرنا چاہ رہے ہیں ان کا حق ہے مگر عام شہریوں کے حقوق بھی متاثر نہیں ہونے چاہئیں۔چیف جسٹس اسلام آباد ہائیکورٹ جسٹس عامرفاروق نے پی ٹی آئی دھرنے کے باعث راستوں کی ممکنہ بندش کے خلاف مقامی تاجروں کی درخواست پرسماعت کی جس میں عدالت نے تاجروں کی درخواست کوپی ٹی آئی دھرنے اور جلسے کے این او سی حصول کی درخواست کے ساتھ یکجا کردیا۔ سماعت کے سلسلے میں ایڈووکیٹ جنرل بیرسٹر جہانگیر جدون اور ایڈیشنل اٹارنی جنرل منوراقبال دوگل عدالت میں پیش ہوئے۔تاجروں کے وکیل نے کہا کہ کنٹینرز کو راستوں میں کھڑا کیا گیا ہے، جس سے مشکلات ہیں جبکہ ایڈووکیٹ جنرل اسلام آباد نے موقف اپنایا کہ دھرنے اور جلسے کے این او سی کے لئے پی ٹی آئی کی درخواست بھی زیرالتوا ہے، اس درخواست کو بھی اس کے ساتھ سنا جائے۔وکیل درخواست گزار نے کہا کہ ہائی ویز اور موٹرویز پر ٹریفک روانی یقینی بنانے کے احکامات جاری کئے جائیں، اس پر چیف جسٹس نے ریمارکس دیئے کہ ہائی ویز اور موٹرویز کو بند کردیں گے تو ٹریڈ بھی متاثر ہو گی، یہ کسی کا حق نہیں ہے کہ وہ کہہ دے کہ موٹروے پردھرنا دے گا اوروہاں کھڑا ہوجائے، جسٹس شوکت عزیز صدیقی نے دھرناکیس میں فیصلہ دیاتھاکہ تمام جلسے پریڈ گرائونڈ میں ہوں گے۔چیف جسٹس نے کہا کہ اسلام آباد میں غیر ملکی بھی ہیں، ڈپلومیٹک موومنٹ بھی متاثر ہوتی ہے، جو جلسہ کرنا چاہ رہے ہیں ان کا حق ہے مگرعام شہریوں کے حقوق بھی متاثر نہیں ہونے چاہئیں۔چیف جسٹس عامر فاروق نے ریمارکس دیئے کہ ہائی ویز اور موٹرویز پر کنٹرول فیڈریشن کا ہے، یہ بات واضح ہے کہ فیڈریشن اس متعلق ڈائریکشن دے سکتی ہے۔بعد ازاں عدالت نے دھرنے اور جلسے سے راستوں کی بندش کے خلاف تاجروں کی درخواست پر سماعت آج (جمعرات تک) ملتوی کردی۔
