روسی تیل کے بعد آنے والے دنوں میں تیل کی قیمتوں پر اثر پڑے گا،مصدق ملک  روس سے ایک لاکھ ٹن تیل کا معاہدہ ہے، پہلی دو شپمنٹس استعمال کرنے کے بعد روس سے مزید تیل خریدیں گے

• خود کو ٹرانسپیرنٹ رکھیں تو دنیا بھی آپ کے ساتھ چلتی ہے، اب تو روس کا تیل پاکستان پہنچ گیا، کسی نے حکومت ختم نہیں کی
• وزیر مملکت برائے پٹرولیم کی نجی ٹی وی سے گفتگو

اسلام آباد (ویب نیوز)

وزیر مملکت برائے پٹرولیم مصدق ملک نے کہا ہے کہ پاکستان پہنچنے والے روسی تیل کے بعد آنے والے دنوں میں تیل کی قیمتوں پر اثر پڑے گا اور عوام کو ریلیف ملے گا۔نجی ٹی وی سے گفتگو کرتے ہوئے مصدق ملک نے کہا کہ روس سے ایک لاکھ ٹن تیل کا معاہدہ ہے، دو جہاز آئیں گے، پہلی دو شپمنٹس استعمال کرنے کے بعد روس سے مزید تیل خریدیں گے۔انہوں نے کہا کہ پاکستان پہنچنے والے روسی تیل سے بھرے جہاز کو آف لوڈ ہونے میں 3 دن لگیں گے۔وزیر مملکت پیٹرولیم نے کہا کہ آذربائیجان سے ہر ماہ ایل این جی کی ایک سستی کارگو خریدنے کا معاہدہ بھی ہو چکا ہے۔ مصدق ملک نے کہا کہ گرین ہائیڈروجن سے متعلق امریکا سے بات چیت چل رہی ہے، سابق وزیرِ اعظم نے امریکا سے کبھی لڑائی اور کبھی دوستی کر کے خارجہ پالیسی خراب کی۔انہوں نے کہا کہ سابق وزیرِ اعظم نے تو یہ بھی کہا تھا کہ فرانس کے صدر کا فون آیا میں نے نہیں اٹھایا، کوئی ان کا فون نہیں اٹھاتا تھا کوئی ان کو فون نہیں کرتا تھا اس وزیرِ اعظم کی کیا بات کریں۔انہوںنے کہا کہ اگر آپ خود کو ٹرانسپیرنٹ رکھیں جیسا ہم نے رکھا تو دنیا بھی پھر آپ کے ساتھ چلتی ہے، اب تو روس کا تیل پاکستان پہنچ گیا کسی نے حکومت ختم نہیں کی۔