دریائے ستلج میں اونچے درجے کا سیلاب، متعدد دیہات زیر آب، فصلیں تباہ سیلابی ریلے کی آمد سے متعدد بند ٹوٹ گئے، کئی دیہات کا آپس میں زمینی رابطہ منقطع ،علاقہ مکین اپنی مدد آپ کے تحت نقل مکانی پر مجبور

• عارف والا میں سیلابی صورتحال کے پیش نظر مختلف علاقوں میں سرکاری سکولز بند کردیئے گئے جہاں فلڈ ریلیف کیمپس قائم کئے گئے

اوکاڑہ، قصور، پاکپتن (ویب نیوز)

دریائے ستلج میں اونچے درجے کے سیلاب کے باعث متعدد دیہات زیر آب آگئے، سینکڑوں ایکڑ پر تیار فصلیں بھی تباہ ہو گئیں۔دریائے ستلج میں سیلابی ریلے کی آمد سے متعدد بند ٹوٹ گئے، کئی دیہات کا آپس میں زمینی رابطہ منقطع ہو گیا ، سیلابی ریلے کے باعث علاقہ مکین اپنی مدد آپ کے تحت نقل مکانی پر مجبور ہیں۔متاثرین کی اپنے مدد آپ کے تحت بند باندھنے کی کوششیں جاری ہیں، بابا فرید پل، موضع ببلانہ، فیروز پور چشتیاں، پیر غنی کے علاقے متاثر ہوئے ہیں، شاہو بلوچ، باقرکی، ماڑی انب، کوٹ بخشا، بھینی نورجہانیاں اور دیگر علاقے سیلاب کی زد میں آ گئے ، سینکڑوں ایکڑ اراضی ایک بار پھر سے زیرآب آ گئی جس سے کسان پریشانی کا شکار ہیں۔ادھر عارف والا میں سیلابی صورتحال کے پیش نظر مختلف علاقوں میں سرکاری سکولز بند کر دئیے گئے ، 6 سرکاری سکولوں میں تعلیمی سرگرمیاں تاحکم ثانی معطل رہیں گی، بند ہونے والے سکولز میں فلڈ ریلیف کیمپس قائم کئے گئے ، بند ہونے والے سکولز میں ٹبی لال بیگ ،نورا رتھ، جلال جموں، ماڈھو فیروزکا اور سالم رتھ شامل ہیں۔ستلج میں ہیڈ سلیمانکی کے مقام پہ 2 لاکھ کیوسک کا سیلابی ریلا گزرنے کا امکان ہے، اس وقت پانی کی آمد 144135 کیوسک ہے پانی کا اخراج 144135 کیوسک ہے، ضلعی انتظامیہ، ریسکیو اہلکار اور پاک فوج کے دستے امدادی کارروائیوں میں مصروف ہیں، تمام تر امدادی کارروائیوں کی نگرانی ڈپٹی کمشنر اوکاڑہ ذیشان حنیف خود کر رہے ہیں۔دوسری جانب قصور کے سیلاب زدگان کیلئے پاک فوج کی امدادی سرگرمیاں جاری ہیں، متاثرہ علاقوں میں گنڈا سنگھ والا، دھپ سری، اٹاری، گھٹی کلنگر، اولاکے، جمعے والا، کمال پورہ، بکرکے اور نجابت شامل ہیں۔پاک فوج کا ہزاروں افراد کو سیلاب سے نکالنے اور محفوظ مقامات پر منتقل کرنے کا عمل جاری ہے، ریسکیو ٹیمیں کشتیوں کے ذریعے امدادی سرگرمیوں میں مصروف ہیں۔ہزاروں متاثرہ خاندانوں میں لگ بھگ 16 ٹن مفت راشن بھی تقسیم کیا گیا، راشن پیکس میں آٹا، دال، چاول، گھی اور دودھ سمیت ضروری اشیائے خورونوش شامل ہیں۔تلوار پل، ٹھٹی بخشی اور نجابت کے مقامات پر راشن کی تقسیم جاری ہے، سیلاب زدگان کیلئے ضروری طبی امداد کا بھی خاطر خواہ انتظام کیا گیا ، امدادی کارروائیاں سیلاب کی صورتحال بہتر ہونے اور معمولات زندگی بحال ہونے تک جاری رہیں گی۔