معاشی بحران کے باوجود پاکستانی فوج آج بھی مضبوط اور بھارت کیلئے خطرہ ہے، جنرل انیل چوہان
حالات پاکستانی فوج کی صلاحیت و مہارت پر اثر انداز نہیں ہوسکے ہیں، بھارت کو بہت سے چیلنجز کا سامنا ہے
چین کا عروج ہمارے لیے بہت بڑا چیلنج ہے ہمارے دو پڑوسی ایسے ہیں جو ہمارے خلاف ہیں
دونوں کا دعوی ہے کہ ان کی دوستی ہمالیہ سے اونچی اور سمندروں سے گہری ہے اور دونوں ایٹمی ہتھیاروں سے بھی لیس ہیں
بھارتی چیف آف ڈیفنس اسٹاف کا نئی دہلی میں مذاکرے سے خطاب
نئی دہلی( ویب نیوز)
بھارت کے چیف آف ڈیفنس اسٹاف جنرل انیل چوہان نے کہا ہے کہ شدید معاشی بحران کے باوجود پاکستانی فوج آج بھی بھارت کے لیے بہت بڑا خطرہ ہے۔ نئی دہلی میں منعقدہ ایک مذاکرے میں خطاب کرتے ہوئے جنرل انیل چوہان نے کہا کہ پاکستان کے معاشی بحران اور دیگر خرابیوں سے فوج کی صلاحیت اور مہارت پر کوئی منفی اثر مرتب نہیں ہوا۔ وہ آج بھی مضبوط اور بھارت کے لیے خطرہ ہے۔ بھارتی چیف آف ڈیفنس اسٹاف نے کہا کہ بھارت کو بہت سے چیلنجوں کا سامنا ہے اور چیلنج ہی کسی قوم کو مضبوط بناتے ہیں۔ کارگل اور گلوان کے کیس میں ہم اس کا مشاہدہ کرچکے ہیں۔ معروف جریدے انڈیا ٹوڈے کے تحت کرائے جانے والے مذاکرے کا عنوان وژن نیشنل سیکیورٹی : دی چیلنجز بیفور تھع انڈین ملٹری تھا۔ ایک اور سوال پر انیل چوہان نے کہا کہ چین کا عروج ہمارے لیے بہت بڑا چیلنج ہے۔ اس سے سرحدی تنازع بھی برقرار ہے۔ ہمارے دو پڑوسی ایسے ہیں جو ہمارے خلاف ہیں۔ دونوں کا دعوی ہے کہ ان کی دوستی ہمالیہ سے اونچی اور سمندروں سے گہری ہے۔ اور دونوں ایٹمی ہتھیاروں سے بھی لیس ہیں۔ بھارتی چیف آف ڈیفینس اسٹاف نے پاکستان اور چین کا نام لیے بغیر مزید کہا کہ ہم اپنے دونوں پڑوسیوں کے عزائم اچھی طرح جانتے ہیں اور ان سے لاحق خطرات کا بھی ہمیں اچھی طرح علم ہے۔ جنرل انیل چوہان کا کہنا تھا کہ آج کی دنیا میں ہماری افواج کے لیے سب سے بڑا چیلنج یہ ہے کہ اسلحہ خانہ تیزی سے تبدیل ہو رہا ہے۔ ہمیں ہتھیاروں کے نئے نظام اور نئی نئی ٹیکنالوجیز اپنانے کے ساتھ ساتھ نئی حکمتِ عملی ترتیب دینا ہوگی۔
