وزیرِ اعظم محمد شہباز شریف کی چیف جسٹس آف پاکستان یحییٰ آفریدی سے ملاقات
چیف جسٹس نے وزیراعظم سے نظام انصاف میں بہتری لانے کیلئے تجاویز مانگ لیں
اسلام آباد( ویب نیوز)
سپریم کورٹ کے چیف جسٹس یحیی آفریدی نے وزیراعظم شہباز شریف سے نظام انصاف میں بہتری لانے کیلئے تجاویز مانگ لیں۔بدھ کے روز وزیراعظم شہباز شریف نے چیف جسٹس ہاس میں جسٹس یحیی آفریدی سے ملاقات کی اور ذمہ داریاں سنبھالنے پر انہیں مبارکباد پیش کی۔وزیراعظم شہبازشریف کی جانب سے چیف جسٹس کے لیے نیک خواہشات کا اظہار کیا گیا اور انہوں نے چیف جسٹس کے دور دراز علاقوں کے دوروں کو سراہا جبکہ انصاف کی بروقت فراہمی کیلئے اسٹیک ہولڈرز سے مشاورت کی بھی تعریف کی۔ملاقات کے دوران وزیراعظم نے ملکی معاشی صورتحال اور سیکیورٹی چیلنجز پر بھی گفتگو کی اور مختلف عدالتوں میں طویل مدت سے زیر التوا ٹیکس تنازعات سے بھی آگاہ کیا۔وزیراعظم نے چیف جسٹس سے زیرالتوا ٹیکس کیسز کے میرٹ پر جلد فیصلوں کی استدعا کی جبکہ چیف جسٹس نے وزیراعظم سے نظام انصاف میں بہتری لانے کیلئے تجاویز مانگیں۔چیف جسٹس یحیی آفریدی کی جانب سے نظام انصاف کی بہتری کیلئے وزیراعظم کی گفتگو کا خیرمقدم کیا گیا اور وزیراعظم کی جانب سے چیف جسٹس کو لاپتہ افراد سے متعلق اقدامات میں تیزی لانے کی بھی یقین دہانی کرائی گئی۔ملاقات میں وفاقی وزرا اعظم نذیر تارڑ ، احد چیمہ، اٹارنی جنرل منصور عثمان اعوان، رجسٹرار سپریم کورٹ سلیم خان اور سیکریٹری لا اینڈ جسٹس کمیشن تنزیلہ صباحت بھی موجود تھے۔
