مسجد الحرام اور مسجد نبوی میں اعتکاف کیلئے رجسٹریشن بدھ سے شروع ہو گی
مکہ مکرمہ (ویب نیوز)
مسجد الحرام اور مسجد نبوی کی دیکھ بھال کے لئے قائم جنرل اتھارٹی نے رمضان کے آخری عشرے میں اعتکاف کے لئے رجسٹریشن کا آغاز بدھ 5 مارچ سے شروع کرنے کا اعلان کیا ہے۔غیرملکی خبررساں ادارے کے مطابق الحرمین الشریفین کے لیے قائم جنرل اتھارٹی کی جانب سے جاری بیان میں کہا گیا کہ مسجدالحرام اور مسجد نبوی میں اعتکاف میں بیٹھنے کے خواہشمند بدھ 5 مارچ صبح گیارہ بجے سے اتھارٹی کے پورٹل پر اپنے کوائف رجسٹرکراسکتے ہیں۔اتھارٹی سرکاری پورٹل کے ذریعے رجسٹرڈ افراد کیلئے مقرر کردہ ضوابط اور شرائط کے مطابق اجازت نامے جاری کرے گی۔ پرمٹ ہولڈر 20 رمضان کو مسجد الحرام یا مسجد نبوی میں اعتکاف میں بیٹھ سکیں گے۔واضح رہے الحرمین الشریفین میں معتکفین کیلئے دستیاب سہولتیں فراہم کی جاتی ہیں۔ ہر معتکف کو خصوصی کارڈ جاری کیا جاتا ہے جبکہ ایک مخصوص لاکر بھی انہیں فراہم کیا جاتا ہے جس میں وہ اپنی ضروری اشیا رکھ سکتے ہیں۔
