کوئٹہ: (ویب  نیوز) سینئر سیاستدان حافظ حسین احمد انتقال کر گئے، وہ گزشتہ کچھ عرصہ سے کافی علیل تھے۔

حافظ حسین احمد 1951 میں کوئٹہ میں پیدا ہوئے تھے، حافظ حسین احمد 2002 تا 2007 اور 1988 تا 1990 تک قومی اسمبلی کے ممبر رہ چکے ہیں۔

سینئر سیاستدان حافظ حسین احمد مارچ 1991 سے مارچ 1994 تک سینیٹ کے رکن بھی رہ چکے ہیں۔

مرحوم کی نماز جنازہ کے وقت اور مقام سے متعلق بعد میں اعلان کیا جائے گا۔

حافظ حسین احمد کی وفات سے حسین یادوں کا ایک باب ختم ہوگیا: مولانا فضل الرحمان 

جے یو آئی سربراہ مولانا فضل الرحمان نے جے یو آئی رہنما، سینئر سیاستدان حافظ حسین احمد کی وفات پر اظہار افسوس کیا۔

مولانا فضل الرحمان کا مزید کہنا تھا کہ اللہ کریم حافظ صاحب کی خدمات کو قبول فرمائے، رمضان کریم کی بابرکت ساعات میں اللہ کریم کے حضور پیش ہونا یقیناً حافظ صاحب کی بلندی درجات کا سبب بنے گا، حافظ صاحب مرحوم کے فرزندان، اہل خانہ متعلقین اور جے یو آئی کارکنوں سے اظہار تعزیت کرتا ہوں۔

جے یو آئی کے امیر نے کہا کہ اہل مدارس، کارکنان اور رہنماء اپنی دعاؤں میں حافظ صاحب کو یاد رکھیں، غم کی اس گھڑی میں اہل خانہ کے ساتھ برابر کا شریک ہوں، اللہ کریم اہلخانہ کو صبر جمیل دے۔