علیمہ خان جے آئی ٹی کے سامنے پیش ،دو گھنٹے تک پوچھ گچھ کی گئی
اسلام آباد ( ویب نیوز)
اسلام آبادسوشل میڈیا پر منفی پراپیگنڈے اور جے آئی ٹی کی تحقیقات کے معاملے میں علیمہ خان جے آئی ٹی کے سامنے پیش ہوئیں جس دوران ان سے دو گھنٹے تک پوچھ گچھ کی گئی ۔ دوسری جانب پی ٹی آئی رہنمائوں کو طلب کرنے والی جے آئی ٹی کیخلاف اسلام آباد ہائی کورٹ میں دائر درخواست پر شیخ وقاص اکرم اور دیگر کو فوری ریلیف نہ مل سکا۔ عدالت نے فریقین کونوٹس جاری کرتے ہوئے اکیس اپریل تک جواب طلب کرلیا ہے ۔ علیمہ خان کو جے آئی ٹی نے آج دوبارہ طلب کیا تھا گزشتہ طلبی پر علیمہ خان جے آئی ٹی کے سامنے پیش نہیں ہوئی تھیں ،علیمہ خان کی وکلا ٹیم بھی علیمہ خان کے ساتھ رہی ،ذرائع نے بتایا کہ علیمہ خان سے پی ٹی آئی کے سوشل میڈیا اکائونٹس اور بانی پی ٹی آئی کے ذاتی اکاوئنٹ سے متعلق پوچھ گچھ کی گئی ۔ دوسری جانب اسلام آباد ہائیکورٹ میں شیخ وقاص اکرم کی درخواست پر جسٹس راجہ انعام امین منہاس نے سماعت کی۔ درخواست گزار کے وکیل نے استدعا کی کہ پیکا کے تحت الزامات کی تحقیقات کیلئے بننے والی جے آئی ٹی غیرقانونی ہے ۔ عدالت اگر اس کی تشکیل کا نوٹیفکیشن معطل نہیں کرتی تو ہراساں کرنے سے روکا جائے ۔ عدالت نے شیخ وقاص اکرم کو جے آئی ٹی میں پیش ہوکر جواب جمع کروانے کی ہدایت کی اور فریقین کو نوٹس جاری کرتے ہوئے سماعت اکیس اپریل تک ملتوی کر دی ۔
