حماس نے امریکی جنگ بندی کی تجویز پر اپنا جواب دے دیا
غزہ میں مکمل جنگ بندی، صہیونی فوج کے انخلا، امدادکی بلاروک ٹوک فراہمی کا مطالبہ شامل ہے
مزاحمتی تنظیم نے ہتھیار ڈالنے کے اسرائیلی مطالبے کو مسترد کر دیا
غزہ (ویب نیوز)
فلسطین کی مزاحمتی تنظیم حماس نے امریکی جنگ بندی کی تجویز پر اپنا جواب دے دیا، جس میں غزہ میں مکمل جنگ بندی کا مطالبہ کیا گیا ہے۔ برطانوی نشریاتی ادارے کے مطابق حماس نے ہفتے کے روز کہا کہ اس نے امریکی صدر ڈونلڈ ٹرمپ کے مشرق وسطی کے ایلچی اسٹیو وٹکوف کی جانب سے پیش کردہ جنگ بندی کی تجویز پر ثالثوں کو جواب دے دیا ہے۔حماس کی جانب سے ڈونلڈ ٹرمپ کو دئیے گئے جواب میں جنگ بندی کا مطالبہ شامل ہے۔ حماس کی جانب سے جاری ایک بیان میں کہا گیا ہے کہ اس معاہدے کے تحت وہ 10زندہ یرغمالیوں کو رہا کریں گے اور 10لاشیں بھی اسرائیل کے حوالے کریں گے جس کے بعد صہیونی ریاست متعدد فلسطینی قیدیوں کو رہا کرے گا جبکہ یہ فلسطینی گروپ کی جانب سے یہ بات اسٹیو وٹکوف کی تجویز سے مطابقت رکھتی ہے۔ حماس کی جانب سے جاری بیان میں مزید کہنا تھا کہ یہ تجویز مستقل جنگ بندی، غزہ کی پٹی سے مکمل انخلا اور ہمارے عوام وخاندانوں کے لیے امداد کی فراہمی کو یقینی بنانے کا مقصد رکھتی ہے۔بیان میں مزید کہا گیا کہ امریکی صدر کو یہ جواب طویل مشاورت کے بعد دیا گیا ہے۔بیان میں یہ ذکر نہیں کیا گیا کہ حماس نے اس تجویز میں کوئی تبدیلی مانگی ہے، تاہم بات چیت سے واقف ایک فلسطینی اہلکار نے برطانوی نشریاتی ادارے کو بتایا کہ حماس نے کچھ ترامیم کی خواہش ظاہر کی ہے، تاہم اس کا جواب مثبت تھا۔دوسری جانب اسرائیلی وزیر اعظم کے آفس نے فوری طور پر اس معاملے پر تبصرہ کرنے کی درخواست کا جواب نہیں دیا۔ اسرائیلی میڈیا نے رواں ہفتے کے آغاز میں اطلاع دی تھی کہ وزیر اعظم بینجمن نیتن یاہو نے غزہ میں قید یرغمالیوں کے خاندانوں کو بتایا تھا کہ اسرائیل نے مشرق وسطی کے لیے ٹرمپ کے ایلچی کی پیش کردہ تجویز کو قبول کر لیا ہے، البتہ وزیر اعظم کے دفتر نے اس وقت کوئی تبصرہ نہیں کیا تھا۔ حماس اور اسرائیل کے درمیان پیدا ہونے والے اختلافات کے باعث مارچ میں ختم ہونے والی جنگ بندی کی دوبارہ بحالی کی کوششوں کو روک دیا تھا۔اسرائیل بضد ہے کہ حماس مکمل طور پر ہتھیار ڈالے، ایک عسکری و حکومتی قوت کے طور پر تحلیل ہو جائے، اور غزہ میں موجود باقی 58یرغمالیوں کو واپس کرے۔تاہم حماس نے ہتھیار ڈالنے کے مطالبے کو مسترد کر دیا ہے، تنظیم کا کہنا ہے کہ اسرائیل کو غزہ سے اپنی فوجیں نکالنی ہوں گی اور جنگ ختم کرنے کا وعدہ کرنا ہوگا۔واضح رہے کہ 7اکتوبر 2023ء کے بعد سے صہیونی ریاست نے فلسطینی شہریوں پر نہ ختم ہونے والے مظالم کا سلسلہ شروع کیا تھا، جس کے نتیجے میں اب تک 54ہزار سے زائد فلسطینی شہید ہوچکے ہیں اور علاقہ مکمل طور پر تباہ ہو چکا ہے۔
