اسحاق ڈارکی امریکی ہم منصب مارکو روبیو سے واشنگٹن ڈی سی میں اہم ملاقات
پاک -امریکہ تعلقات اور مختلف شعبہ جات میں ممکنہ تعاون پر تفصیلی بات چیت
دوطرفہ تعلقات کے فروغ اورمختلف شعبہ جات میں مضبوط اورمنظم روابط استوار کرنے کے ضمن میں مل کر کام کرنے کے عزم کا اعادہ
واشنگٹن(ویب نیوز)
پاکستان کے نائب وزیر اعظم /وزیر خارجہ سینیٹر محمد اسحاق ڈار نے امریکی ہم منصب مارکو روبیو سے واشنگٹن ڈی سی میں اہم ملاقات کی ، ملاقا ت میں دونوں رہنماوں نے دوطرفہ تعلقات کے فروغ اورمختلف شعبہ جات میں مضبوط اورمنظم روابط استوار کرنے کے ضمن میں مل کر کام کرنے کے عزم کا اعادہ کیا ، امریکی محکمہ خارجہ (سٹیٹ ڈیپارٹمنٹ) پہنچنے پر امریکی حکام کی جانب سے نائب وزیر اعظم / وزیر خارجہ پاکستان محمد اسحاق ڈار کا استقبال کیا گیا ، امریکہ میں پاکستان کے سفیر رضوان سعید شیخ بھی نائب وزیر اعظم / وزیر خارجہ کے ہمراہ ملاقات میں موجود تھے ، وفود کی سطح پر ہونے والی ملاقات میں دونوں فریقین کی جانب سے سینئر حکام شریک ہوئے ، پاکستا ن اور امریکہ کے وزرا خارجہ کے درمیان یہ پہلی با لمشافہ ملا قات ہے۔ اس سے قبل دونوں رہنماوں کے درمیان ٹیلی فونک روابط قائم تھے۔ ملاقات میں پاک -امریکہ تعلقات اور مختلف شعبہ جات میں ممکنہ تعاون پر تفصیلی بات چیت ہوئی جبکہ دوطرفہ تجارتی و اقتصادی روابط کے فروغ، سرمایہ کاری، زراعت، ٹیکنالوجی، معدنیات سمیت اہم شعبہ جات میں تعاون پر تبادلہ خیال کیا گیا ،ملاقات میں انسدادِ دہشت گردی اور علاقائی امن کے حوالے سے بھی بات چیت ہوئی، نائب وزیر اعظم / وزیر خارجہ پاکستان محمد اسحاق ڈار نے عالمی امن کے فروغ کے حوالے سے صدر ٹرمپ اور امریکی قیادت کی کوششوں کو خراجِ تحسین پیش کیا ،انہوں نے کہاکہ حالیہ پاک بھارت کشیدگی کے حوالے سے صدر ٹرمپ کا کردار اور کاوشیں لائق تحسین ہیں،امریکی وزیرِ خارجہ مارکو روبیو کی جانب سے دہشت گردی کے خلاف جنگ میں پاکستان کی لازوال قربانیوں کا اعتراف کیا گیا ،امریکی وزیر خارجہ نے کہاکہ عالمی و علاقائی امن کے حوالے سے پاکستان نے ہمیشہ مثبت کردار ادا کیا ،اسحاق ڈارنے کہاکہ پاک امریکہ دوطرفہ تعلقات میں مزید وسعت اور استحکام کے خواہاں ہیں دونوں ملکوں کے درمیان جاری ٹریڈ ڈائیلاگ میں مثبت پیش رفت کے حوالے سے پر امید ہیں انہوں نے کہاکہ پاکستان امریکی کاروباری برادری اور سرمایہ کاروں کے لئے پرکشش منزل ہے، علاقائی امن کے حوالے سے دونوں ممالک کے نقطہ نظر اورمفادات میں ہم آہنگی ہے: نائب وزیر اعظم نے کہاکہ امریکہ میں موجود پاکستانی کمیونٹی دونوں ممالک کے درمیان ایک پل کا کردار ادا کر رہی ہے ،دونوں رہنماوں نے دوطرفہ تعلقات کے فروغ اورمختلف شعبہ جات میں مضبوط اورمنظم روابط استوار کرنے کے ضمن میں مل کر کام کرنے کے عزم کا اعادہ کیا
