کوئٹہ ،شاہوانی اسٹیڈیم کے باہر سردار اختر مینگل کی گاڑی کے قریب خودکش دھماکہ ، 5افراد جاں بحق،30سے زائد زخمی
اختر مینگل محفوظ رہے، سول ہسپتال اور ٹراما سینٹر میں ایمرجنسی نافذ
کوئٹہ (ویب نیوز) بلوچستان کے دارالحکومت کوئٹہ میں شاہوانی اسٹیڈیم کے باہر خودکش دھماکہ ہوا ہے، جس کے نتیجے میں 5افراد جاں بحق جبکہ30 سے زائد افراد کے زخمی ہوگئے ۔سول ہسپتال اور ٹراما سینٹر میں ایمرجنسی نافذکردی گئی ہے۔ پارٹی کے ذرائع کے مطابق دھماکا بی این پی کے سربراہ سردار اختر مینگل کی گاڑی کے قریب ہوا۔ دھماکا اس وقت ہوا جب سردار اختر مینگل شاہوانی اسٹیڈیم سے باہر نکل رہے تھے تاہم دھماکے میں سردار اختر مینگل محفوظ رہے۔ دھماکے کے بعد پولیس اور ریسکیو ٹیمیں جائے وقوعہ پر پہنچ گئیں جبکہ پولیس نے علاقے کو گھیرے میں لے لیا، جہاں دھماکے کی نوعیت کا تعین کیا جارہا ہے۔ پولیس کے مطابق دھماکے سے 4 گاڑیوں کو شدید نقصان پہنچا، زخمیوں کو سول اور بی ایم سی منتقل کیا جا رہا ہے، متعدد افراد کی حالت تشویشناک ہے جبکہ موقع پر امدادی آپریشن جاری ہے۔ دوسری جانب محکمہ داخلہ بلوچستان کے مطابق حکومت نے شاہوانی اسٹیڈیم میں دھماکے کی تحقیقات کا حکم دیا ہے، امدادی ٹیمیں جائے وقوعہ پر پہنچ گئیں، دھماکہ کی جگہ سے زخمی کارکنوں کو اٹھا کر ہسپتال منتقل کیا جارہا ہے جن میں شدید زخمی بھی شامل ہیں جبکہ سیکیورٹی فورسز نے علاقے کو گھیرے میں لے کر شواہد اکٹھے کرنا شروع کردئیے۔محکمہ داخلہ بلوچستان نے واقعے کی اعلی سطح پر تحقیقات کا حکم دے دیا اور کہا ہے کہ عوام سے اپیل ہے کہ افواہوں پر کان نہ دھریں اور اداروں سے تعاون کریں۔
