پیپلزپارٹی کا حکومت کو وعدوں پر عملدرآمد کیلئے مزید ایک ماہ کا وقت دینے کا فیصلہ
شیری رحمان اور ، ندیم افضل چن کی دیگر رہنمائوں کے ہمراہ میڈیا کو بریفنگ
کراچی ( ویب نیوز)
پاکستان پیپلز پارٹی (پی پی پی)نے بطور اتحادی پارٹی حکومت کو مزید وقت دینے کا فیصلہ کرلیا۔چیئرمین پاکستان پیپلز پارٹی (پی پی پی) بلاول بھٹو کی زیر صدارت سینٹرل ایگزیکٹو کمیٹی کے اجلاس میں حکومت کو وعدوں پر عملدرآمد کے لیے ایک ماہ کا مزید وقت دینے کا فیصلہ کیا گیا ہے۔سی ای سی اجلاس کے بعد پاکستان پیپلز پارٹی کی سینئر رہنما شیری رحمان نے ندیم افضل چن اور دیگر رہنمائوں کے ہمراہ میڈیا کو بریفنگ دی۔شیری رحمان نے کہا ہے کہ آج ہونے والے اجلاس میں دہشتگردی کی مذمت کرتے ہوئے یہ فیصلہ کیا گیا ہے کہ اس جنگ میں افواج پاکستان کے شانہ بشانہ ہیں۔انہوں نے کہاکہ حکومت سازی کے وقت مسلم لیگ (ن) سے جو وعدے ہوئے تھے ان پر عملدرآمد کے حوالے سے بات چیت کی گئی ہے، جس پر فیصلہ کیا گیا کہ حکومت کو ایک ماہ کا مزید وقت دیا جائیگا اور پھر ایک ماہ بعد دوبارہ سی ای سی کا اجلاس ہوگا۔شیری رحمان نے کہاکہ حکومت نے سازی میں پیپلز پارٹی نے اہم کردار ادا کیا ہے، ہم نے ہمیشہ جمہوریت کے لیے قربانی دی۔انہوں نے کہاکہ کئی مواقع پر ہم سے وعدے کیے گئے اور ہمیں توقع تھی کہ یہ وعدے پورے کیے جائیں گے تاہم ایسا نہیں ہو سکا۔انہوں نے کہاکہ پنجاب حکومت نے سیلاب متاثرین کے بجلی بل معاف کیے جو لائق تحسین ہے، بلاول بھٹو نے حکومت سے یہ مطالبہ کیا تھا۔
