دینی مدارس کے خلاف منفی پروپیگنڈا کیا جارہا ہے، مولانا فضل الرحمان فورتھ شیڈول میں شامل کرنے کی دھمکیاں دی جاتی ہیں ،،ملتان میں علما کنونشن سے خطاب

دینی مدارس کے خلاف منفی پروپیگنڈا کیا جارہا ہے، مولانا فضل الرحمان

فورتھ شیڈول میں شامل کرنے کی دھمکیاں دی جاتی ہیں ، بھاڑ میں جائے فورتھ شیڈول،ملتان میں علما کنونشن سے خطاب

ملتان (ویب  نیوز) 

جمعیت علما اسلام (جے یو آئی) کے سربراہ مولانا فضل الرحمان نے کہا ہے کہ  دینی مدارس کے خلاف منفی پروپیگنڈا کیا جارہا ہے،  ایجنڈا کے ذریعے نوجوان نسل کو مشتعل کرنا ہے۔ ملتان میں علما کنونشن سے خطاب کرتے ہوئے فضل الرحمان  نے کہا کہ پاکستان اسلام کے نام پر قائم ہوا ہے، پاکستان کے لیے برصغیر کے لاکھوں مسلمانوں نے قربانیاں دیں، مدارس کے کردار کو ختم کیا جا رہا ہے۔فضل الرحمان نے کہا کہ  ہمیں قومی دائرے میں آنے کا کہا جاتا ہے، یہ کہتے ہیں ہم تو علماء کو 25ہزار روپے دینا چاہتے ہیں، علماء کو سپورٹ کرنا چاہتے ہیں، کس مد میں ملا کے ضمیر کو خریدنا چاہتے ہو۔مولانا فضل الرحمان نے مزید کہا ہے کہ حکمرانوں نے ہمیں فرقوں میں لڑانے کی کوشش کی، افغانستان کو تباہ و برباد کردیا، کہتے ہیں کہ امن کیلئے آئے ہیں، عراق، شام، فلسطین کو تباہ کردیا اور تب بھی یہی کہتے ہیں، کہتے ہیں کہ ہم امن کیلئے آئے ہیں۔ فضل الرحمان نے کہا کہ سیلاب آیا، اس وقت حکومت کہاں گئی تھی، میدان میں یہ فقیر نظر آرہے ہیں تو حکومت کرنا بھی ان کا حق ہے تمہارا نہیں، پسماندہ طبقات کو اٹھائو، ان کا خیال رکھو عوام میں بیداری پیدا کریں۔مولانا فضل الرحمان نے مزید کہاکہ حکومتی حلقوں کی جانب سے سعودی عرب اور متحدہ عرب امارات کی مثالیں دی جاتی ہیں تو پھر وہی نظام مکمل طور پر نافذ کیا جائے۔انہوں نے خبردار کرتے ہوئے کہا کہ فورتھ شیڈول میں شامل کرنے کی دھمکیاں دی جاتی ہیں، لیکن وہ ایسی دھمکیوں سے خوفزدہ نہیں۔ بھاڑ میں جائے فورتھ شیڈول۔انہوں نے یہ بھی بتایا کہ مدارس کی رجسٹریشن سے متعلق قانون پہلے ہی منظور ہو چکا ہے۔