اسلام آباد میں اب تک کتنی گاڑیوں کو ایمـٹیگ جاری ہوئے؟چیرمین سی ڈی اے کو بریفنگ
اقدامات کا بنیادی مقصد وفاقی دارالحکومت اسلام آباد کو محفوظ شہر بنانا اور شہریوں کو ایک پر امن اور پر سکون ماحول فراہم کرنا ہے،چیئرمین سی ڈی اے و چیف کمشنر اسلام آباد
اسلام آباد: (ویب نیوز) چیف کمشنر اسلام آباد و چیئرمین کیپیٹل ڈویلپمنٹ اتھارٹی (سی ڈی اے) محمد علی رندھاوا کی زیر صدارت بدھ کے روز سی ڈی اے ہیڈکوارٹرز میں غیر قانونی طور پر مقیم غیر ملکی افراد کے خلاف کاروائی کیلئے خصوصی ٹاسک فورس کا اجلاس منعقد ہوا۔ جسمیں انسپکٹر جنرل اسلام آباد پولیس سید علی ناصر رضوی، ڈپٹی کمشنر اسلام آباد عرفان نواز میمن سمیت مختلف اضلاع راولپنڈی، اٹک، ہری پور اور مری کی ضلعی انتظامیہ و پولیس بزریعہ زوم لنک اور وزارت داخلہ، نادرا، پی ٹی اے اور دیگر متعلقہ افسران نے شرکت کی۔ اجلاس میں ابتک کی پیشرفت کا تفصیلی جائزہ اور مستقبل کی حکمت عملی پر تبادلہ خیال کیا گیا۔ متعلقہ افسران نے چیف کمشنر اسلام آباد و چیئرمین سی ڈی اے کو اس سلسلہ میں ہونے والی پیشرفت پر بریفنگ دیتے ہوئے بتایا کہ مختلف اضلاع سے غیر قانونی طور پر مقیم غیر ملکی افراد کو واپس بھیجنے کا سلسلہ تیزی سے جاری ہے اور غیر قانونی طور پر مقیم غیر ملکی افراد کی زیادہ تر تعداد کو رضاکارانہ طور پر واپسی کو یقینی بنایا گیا ہے۔ غیر قانونی طور پر مقیم غیر ملکی افراد کے مالک مکانوں کے خلاف قانون کے مطابق کاروائیوں کا عمل جاری ہے. چیف کمشنر اسلام آباد نے اس سلسلہ میں ہدایت دی کہ ملحقہ علاقوں میں غیر قانونی غیر ملکیوں کی نقل و حرکت کو مکمل طور پر روکنے کیلئے سخت اقدامات کئے جائیں۔ انہوں نے کہا کہ غیر قانونی طور پر مقیم غیر ملکی افراد کو بجلی سمیت دیگر یوٹیلٹیز کی فراہمی پر پابندی عائد کرنے کے حوالے سے بھی اقدامات کئے جائیں۔ چیف کمشنر اسلام آباد و چیئرمین سی ڈی اے نے ہدایت کی کہ غیر قانونی ملکیوں کو کسی قسم کی رہائشی جگہ یا روزگار فراہم نہ کیا جائے۔ انہوں نے ہدایت کی کہ تمام اضلاع سے اعداد و شمار کو وفاقی وزارت داخلہ کے مرکزی ڈیش بورڈ سے مربوط کیا جائے۔ انسپکٹر جنرل اسلام آباد پولیس سید علی ناصر رضوی نے کہا کہ سخت اقدامات کے ذریعے غیر قانونی طور پر مقیم افراد کی بستیوں کو ختم کرنے کیلئے اقدامات کئے جائیں۔ انہوں نے کہا کہ غیر ملکی افراد کا جعلی دستاویزات پر طبی معاملات اور جعلی شناختی کارڈز کے حوالے سے بھی سخت کارروائی کی جائے۔ پاکستان ٹیلی کمیونیکیشن (پی ٹی اے) کے افسران نے بریفنگ دیتے ہوئے بتایا کہ غیر قانونی طور پر مقیم افراد کی موبائل سمز کو بلاک کرنے کا عمل جاری ہے۔ اجلاس کو بریفنگ دیتے ہوئے بتایا گیا کہ وفاقی دارالحکومت اسلام آباد میں ڈور ٹو ڈور سروے کا عمل تیزی سے جاری ہے تاکہ رہائشیوں کی مکمل معلومات کو اکٹھا کیا جاسکے۔ اسی طرح اسلام آباد میں رہائش پذیر ہر شخص کا ڈیٹا درج کیا جا رہا ہے جسمیں شناختی کارڈ اور رہائشیوں کی بنیادی معلومات شامل ہیں۔ اجلاس کو بتایا گیا کہ ڈور ٹو ڈور سروے کے عمل کو تیز تر بنانے کیلئے ایک خودکار موبائل ایپ بھی تیار کی گئی ہے جسمیں شہری خود تمام معلومات کا اندراج کرسکتے ہیں۔ اس ایپ میں شہری اپنے خاندان، ملازمین، قومیت اور کرائے دار کی ساری معلومات کا اندراج بھی کر رہے ہیں۔ اجلاس کو بتایا گیا کہ سروے ٹیمز نے ابتک ڈور ٹو ڈور سروے کے زریعے 25000 سے زائد خاندانوں کا سروے مکمل کرلیا ہے اور اگلے چند ماہ کے دوران وفاقی دارالحکومت اسلام آباد کے تقریباً ایک لاکھ گھروں کا سروے بھی مکمل کرلیا جائے گا۔ اجلاس کو بریفنگ دیتے ہوئے بتایا گیا کہ ڈیٹا کی حفاظت کو یقینی بنانے کیلئے نادرا کے پاس تمام ڈیٹا اور معلومات کو محفوظ کیا جا رہا ہے۔ اجلاس میں ڈور ٹو ڈور سروے کے عمل کو تیز کرنے، نیز نادرا اور پولیس کے سروے ڈیٹا کو مربوط اور متحرک بنانے پر اتفاق کیا گیا۔ بریفنگ دیتے ہوئے بتایا گیا کہ وفاقی دارالحکومت اسلام آباد کو مزید محفوظ اور پُرامن بنانے کیلئے ایمـٹیگ کے نفاذ کا سلسلہ بھی تیزی سے جاری ہے اور اس سلسلہ میں ابتک وفاقی دارالحکومت اسلام آباد میں 52000 سے زائد گاڑیوں کو ایمـٹیگ جاری کردئیے گئے ہیں۔ بریفنگ دیتے ہوئے بتایا گیا کہ اس ضمن وفاقی دارالحکومت اسلام آباد میں مختلف مقامات پر اس نظام کے مؤثر نفاذ کو یقینی بنایا جارہا ہے۔ چیئرمین سی ڈی اے و چیف کمشنر اسلام آباد محمد علی رندھاوا نے کہا کہ ان اقدامات کا بنیادی مقصد وفاقی دارالحکومت اسلام آباد کو محفوظ شہر بنانا اور شہریوں کو ایک پر امن اور پر سکون ماحول فراہم کرنا ہے
