فلسطین کے نحیف بچوں کی سوشل میڈیا پر تصویریں امریکہ، اقوام متحدہ پر کلنک کا ٹیکہ ہے، حافظ نعیم الرحمن
اہل غزہ فاقوں سے شہید ہورہے ہیں، اسرائیل اسے اپنی فتح قرار دے رہا ہے، امیر جماعت اسلامی
لاہور( ویب نیوز)
امیر جماعت اسلامی حافظ نعیم الرحمن نے کہا ہے کہ غزہ کی 21 لاکھ کی آبادی کو بھوک کا سامنا ہے، لوگ فاقوں سے شہید ہورہے ہیں جب کہ اسرائیل اسے اپنی فتح قرار دے رہا ہے۔انہوں نے سماجی رابطوں کی ویب سائٹ ایکس پر فلسطین کے ایک نحیف بچے کی تصویر شیئر کرکے اسلامی دنیا کے حکمرانوں اور عالمی ضمیر کو جھنجھوڑنے کی کوشش کرتے ہوئے کہا ہے کہ یہ غزہ کا فاقہ زدہ بچہ اٹھارہ ماہ کا محمد زکریا ہے جس کی تصویر امریکا، اور اقوام متحدہ پر کلنک کا ٹیکہ ہے۔ یہ نام نہاد ”مہذب” دنیا کی ناکامی اور عالمی قوانین کی پامالی ہے۔امیر جماعت اسلامی نے مزید کہا ہے کہ فلسطین میں صہیونی افواج کی سفاکیت انسانی تاریخ کی بدترین مثال ہے، اسرائیل کی بارود اور آگ کی بارش بلاتمیز مساجد، ہسپتالوں، سکولوں اور پناہ گزین کیمپوں پر جاری ہے، بمباری سے ساٹھ ہزار سے زائد لوگ جن میں بڑی تعداد بچوں اور خواتین کی ہے شہید ہوگئے ہیں، زخمیوں اور ملبے تلے دب جانے والوں کی تعداد کا تاحال اندازہ نہیں۔ دوسری جانب اسرائیل نے لاکھوں کی آبادی کو خوراک اور ادویات کی ترسیل پر بھی پابندی لگا رکھی ہے، اہل غزہ کو پینے کے پانی تک کی عدم دستیابی کا سامنا ہے۔ انہوں نے کہا کہ صہیونی مظالم کو ٹرمپ کی مکمل پشت پناہی میسر ہے جب کہ پاکستان کے حکمرانوں نے اسے نوبل انعام کے لیے نامزد کردیا ہے۔ حافظ نعیم الرحمن نے مطالبہ کیا ہے اسلامی دنیا اور بالخصوص عرب ممالک اور پاکستان کے حکمران خواب خرگوش سے بیدار ہوں اور غزہ کے معاملہ پر امت کے جذبات کی ترجمانی کریں۔
