اسلام آباد (ویب ڈیسک)
این سی او سی نے کراچی میں کورونا کیسز بڑھنے پر تشویش کا اظہار کر دیا۔ ہیلتھ پروٹوکول پرعمل ناگزیر قرار دے دیا گیا۔
وفاقی وزیر اسد عمر کی زیر صدارت این سی او سی کا اجلاس ہوا جس میں بریفنگ دیتے ہوئے بتایا گیا کہ کراچی میں کورونا کیسز بڑھ رہے ہیں، ملک میں 747 کیسز میں 365 صرف کراچی میں ہیں۔ ڈاکٹر فیصل سلطان نے کہا کورونا وبا کو روکنے کیلئے سمارٹ لاک ڈاؤن کیا جائے، کورونا پر متاثرین تک رسائی، ہیلتھ پروٹوکول پر عمل ناگزیر ہے جبکہ سندھ ہیلتھ سیکرٹری کا کہنا تھا کہ شہری انتظامیہ صورتحال مانیٹر کر رہی ہے، سٹیک ہولڈرز کی مشاورت سے مناسب انتظامات کئے جائیں گے۔
خیال رہے کورونا وائرس سے 5 افراد جاں بحق ہوگئے، جس کے بعد اموات کی تعداد 6 ہزار 479 ہوگئی۔ پاکستان میں کورونا کے تصدیق شدہ کیسز کی تعداد 3 لاکھ 12 ہزار 263 ہوگئی۔
نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 747 نئے کیسز رپورٹ ہوئے، پنجاب میں 99 ہزار 378، سندھ میں ایک لاکھ 36 ہزار 795، خیبر پختونخوا میں 37 ہزار 776، بلوچستان میں 15 ہزار 257، گلگت بلتستان میں 3 ہزار 778، اسلام آباد میں 16 ہزار 581 جبکہ آزاد کشمیر میں 2 ہزار 698 کیسز رپورٹ ہوئے۔
ملک بھر میں اب تک 35 لاکھ 14 ہزار 237 افراد کے ٹیسٹ کئے گئے، گذشتہ 24 گھنٹوں کے دوران 32 ہزار 31 نئے ٹیسٹ کئے گئے، اب تک 2 لاکھ 96 ہزار 881 مریض صحتیاب ہوچکے ہیں جبکہ 467 مریضوں کی حالت تشویشناک ہے۔
پاکستان میں کورونا سے ایک دن میں 5 افراد جاں بحق ہوئے جس کے بعد وائرس سے مرنے والوں کی تعداد 6 ہزار 479 ہوگئی۔ پنجاب میں 2 ہزار 234، سندھ میں 2 ہزار 497، خیبر پختونخوا میں ایک ہزار 259، اسلام آباد میں 182، بلوچستان میں 145، گلگت بلتستان میں 88 اور آزاد کشمیر میں 74 مریض جان سے ہاتھ دھو بیٹھے۔
