پہلے دباو لیا نہ اب لیں گے ،سینٹ الیکشن میں باآسانی کامیابی حاصل کریں گے ، عمران خان
اسلام آباد(ویب نیوز)وزیراعظم عمران خان نے کہا ہے کہ پہلے دباو لیا نہ اب لیں گے ، تحفظات کے باوجود ارکان پارلیمنٹ ہمارے ساتھ کھڑے ہیں، سینیٹ الیکشن میں باآسانی کامیابی حاصل کریں گے ۔میڈیا رپورٹس کے مطابق وزیر اعظم حکو متی ترجمانوں کے اجلاس سے خطاب کررہے تھے ، وزیراعظم کے زیر صدارت حکومتی ترجمانوں کا اجلاس ہوا جس میں موجودہ سیاسی صورتحال اور سینیٹ الیکشن سے متعلق تبادلہ خیال کیا گیا۔ اجلاس میں حکومتی فیصلوں اور کفایت شعاری پر ترجمانوں کو بریفنگ دی گئی۔اجلاس میں اپوزیشن اتحاد کے مشترکہ امیدوار یوسف رضا گیلانی کو ٹکٹ جاری کرنے پر بھی بات چیت کی گئی۔ اس موقع پر اجلاس سے خطاب میں وزیراعظم کا کہنا تھا کہ پی ڈی ایم کا لانگ مارچ بھی جلسوں کی طرح بری طرح ناکام ہوگا،ان کا کہنا تھا کہ سینیٹ الیکشن میں باآسانی کامیابی حاصل کریں گے۔ ہم نے بہترین امیدواروں کو سینیٹ کے ٹکٹ دیے ہیں۔ ہم نے ارب پتی لوگوں کو سینیٹ ٹکٹ کی روایت توڑ دی ہے۔، ارکان پارلیمنٹ تحفظات کے باوجود پارٹی کے ساتھ کھڑے ہیں۔ ارکان قومی و صوبائی اسمبلی کے گلے شکوے دور کریں گے ،عمران خان کا کہنا تھا کہ ہمارے دور میں وزیراعظم آفس کا خرچہ 506 ملین سے کم 243 ملین کیا گیا۔ لوگوں کو پتا ہونا چاہیے کہ مشکل حالات میں حکومت ان کے ساتھ ہے۔وزیراعظم نے کہا کہ آج سارے معاشی اعشاریے بہتری کی طرف جا رہے ہیں۔ بڑے عرصے کے بعد لارج اسکیل مینوفیکچرنگ میں واضح اضافہ ہورہا ہے۔
