سکھر حیدرآباد موٹروے سے عوام کو بہت فائدہ ہوگا، کامیاب جوان پروگرام کی تقریب سے خطاب
سندھ قدرتی وسائل سے مالا مال صوبہ ہے، صوبہ سندھ کے لئے446 ارب روپے کا پیکج ہے،اسد عمر
سکھر (ویب ڈیسک)
وزیراعظم عمران خان نے کہا ہے کہ احساس پروگرام کا 33 فیصد ہم نے سندھ پر خرچ کیا، کراچی سے منسلک جزیرے پر ایک بڑا منصوبہ لیکر آرہے ہیں۔ انہوںنے سکھر میں کامیاب جوان پروگرام کی تقریب سے خطاب کرتے ہوئے کہا کہ اندرون سندھ آنے پر خوشی ہوئی ہے، اندرون سندھ آنا میری خواہش تھی کیونکہ یہ پاکستان کا سب سے غریب ترین علاقہ ہے۔انہوں نے کہا کہ دورے کرتا تھا تو بلوچستان اور اندرون سندھ سب سے پیچھے لگے،سکھر حیدرآباد موٹروے سے عوام کو بہت فائدہ ہوگا۔انہوںنے کہا کہ اندرون سندھ لوگ بنیادی سہولیات سے محروم ہیں، سندھ کے کئی علاقے آگے جانے کے بجائے پیچھے جارہے ہیں، پنجاب میں ہمارا مقابلہ مافیا کے ساتھ تھا۔انہوں نے کہا کہ ہنر سکھادیں تو نوجوان اثاثہ بن جائیں گے، ورنہ بوجھ بنیں گے، ہم نے نوجوانوں کی تربیت پر پورا زور لگانا ہے، پوری کوشش ہے کہ نوجوانوں کو ان کے پائوں پر کھڑا کریں۔انہوں نے کہا کہ نیوزی لینڈ کی کل آبادی مشکل سے پچاس ساٹھ لاکھ جبکہ پاکستان کی بائیس کروڑ ہے، کم آبادی ہونے کے باوجود نیوزی لینڈ میں کھیلوں کے میدان پاکستان سے زیادہ ہیں۔انہوں نے کہا کہ کراچی سے منسلک جزیرے پر ایک بڑا منصوبہ لیکر آرہے ہیں، کراچی جزیرے پر منصوبے پرچالیس ارب سرمایہ کاری ہونا تھی، سارا فائدہ تو سندھ کو ہونا تھا۔وفاق کی دلچسپی زرمبادلہ ذخائر بڑھانے اور روپیہ مضبوط کرنے میں تھی، سندھ کی حکومت نے این او سی دیکر کینسل کردیا، جس سے نقصان تو سندھ حکومت کو ہوگا، سندھ حکومت این اوسی واپس لینے کے فیصلے پرنظرثانی کرے،پنجاب میں مافیا کے ساتھ مقابلہ ہے، اس لیے سندھ میں وقت نہیں گزارسکا،۔انہوں نے کہا کہ کورونا وبا کے دوران لاک ڈائون سے دوسرے ممالک میں غریب طبقہ پس گیا، غریبوں کی بحالی کے لئے احساس پروگرام لیکر آئے، احساس پروگرام کا 33 فیصد ہم نے سندھ پر خرچ کیا۔وزیراعظم نے کامیاب نوجوان پروگرام کے تحت نوجوانوں میں چیکس بھی تقسیم کئے،عمران خان کو گورنر عمران اسماعیل نے سندھی اجرک پہنائی۔ اس سے قبل وزیر اعظم عمران خان کے سکھر ایئرپورٹ پہنچنے پر گورنرسندھ اور دیگر رہنمائوں نے استقبال کیا۔۔ تقریب سے خطاب کرتے ہوئے وفاقی وزیر برائے منصوبہ بندی اسد عمر نے کہا کہ پاکستان میں صرف ایک لیڈر ہے جو قومی سوچ رکھنے والا لیڈر ہے، عمران خان واحد وہ لیڈر ہے جو پورے پاکستان کا لیڈر ہے۔اسد عمر نے کہا کہ سندھ قدرتی وسائل سے مالا مال صوبہ ہے، صوبہ سندھ کے لئے446 ارب روپے کا پیکج ہے، پاکستان کا سب سے زیادہ گیس پیدا کرنیوالا صوبہ سندھ ہے۔انہوں نے کہا کہ سب سے زیادہ پیداوار کے باوجود سندھ کے بہت سے علاقے گیس سے محروم ہیں، جب وفاق سندھ کی خدمت کرنے کی کوشش کرتا ہے تو صوبائی حکومت رکاوٹیں ڈالتی ہے، وزیراعظم کے سندھ کے لئے پیکج میں بڑے بڑے فیصلے کئے گئے ہیں۔انہوںنے کہا کہ بجلی اور گیس کی ترسیل بہتر بنانے کا 52 ارب روپے کا منصوبہ اگلے دو سال میں مکمل ہوگا، سندھ کے نوجوانوں کے لئے ڈیجیٹل اسکلز پروگرام بھی شامل ہے۔انہوں نے کہا کہ عمران خان کا مشن دبئی لندن میں جائیداد بنانا نہیں اور نہ ہی سوئس بینک اکائونٹ میں رقم جمع کرنا ہے۔
