غیر معیاری ادویات تیاری ‘ڈریپ نے 5 لوکل دوا ساز کمپنیوں کے لائسنس کینسل کر دیئے
12 لوکل دوا سازکمپنیوں کے لائسنس معطل کر دئیے، ایکشن ڈریپ ایکٹ 2012 کے تحت لیا گیا
دوا ساز کمپنیوں نے گڈ مینوفیکچرنگ پریکٹس کی خلاف ورزی کی، کارروائی فیلڈ ٹیمز کی سفارش پر کی گئی، سی ای او ڈریپ ڈاکٹرعاصم
اسلام آباد( ویب نیوز) ڈرگ ریگولیٹری اتھارٹی نے غیر معیاری ادویات تیار کرنے والی دوا ساز کمپنیوں کے خلاف ایکشن لیتے ہوئے 5لوکل دوا ساز کمپنیوں کے لائسنس کینسل کر دئیے۔ذرائع کے مطابق ڈرگ ریگولیٹری اتھارٹی نے 12 لوکل دوا سازکمپنیوں کے لائسنس معطل کر دئیے۔ڈریپ نے سندھ کی پانچ، بلوچستان کی ایک دوا ساز کمپنی کا لائسنس معطل کردیا جبکہ خیبرپختونخوا کی 5 اور اسلام آباد کی ایک دواساز کمپنی کا لائسنس معطل کردیا گیا۔ذرائع کے مطابق ڈریپ نے پنجاب کی 2، سندھ کی 2 اور اسلام آباد کی 1 فارما کمپنی کا لائسنس کینسل کردیا۔ذرائع کے مطابق دوا ساز کمپنیز کے خلاف ایکشن ڈریپ ایکٹ 2012 کے تحت لیا گیا۔دوسری جانب سی ای او ڈریپ ڈاکٹر عاصم رف نے فارما کمپنیز کے خلاف کاروائی کی تصدیق کرتے ہوئے کہا کہ دوا ساز کمپنیوں نے گڈ مینوفیکچرنگ پریکٹس کی خلاف ورزی کی۔ڈاکٹرعاصم کے مطابق دواساز کمپنیز کے خلاف کارروائی فیلڈ ٹیمز کی سفارش پر کی گئی۔ انسپکشن میں کمپنیز غیر معیاری دوا سازی کی مرتکب پائی گئیں۔سی ای او ڈریپ کا کہنا ہے کہ ملک میں عالمی معیار کی دواسازی دستیابی اولین ترجیح ہے۔ ڈریپ ایکٹ کی خلاف ورزی کرنے والوں سے سختی سے نمٹا جائے گا۔ غیر معیاری ادویات کے خلاف ملک گیر آپریشن جاری رہے گا۔
