اسلام آباد میں بلدیاتی انتخابات سے متعلق کیس پر فیصلہ محفوظ

 وفاقی حکومت کو پابند بنایا جائے کہ اسلام آباد میں بلدیاتی انتخابات کیلئے جلد انتظامات کیے جائیں،ڈی جی لاالیکشن کمیشن

 وفاقی حکومت اسلام آباد کے بلدیاتی اداروں کو مزید اختیارات دینے کے لیے نیا قانون بنا رہی ہے،سیکرٹری داخلہ

اس میں کتنا مزید وقت لگے گا،ممبربلوچستان الیکشن کمیشن

 قانون سازی میں وقت لگتا ہے، وفاقی کابینہ نے نئے قانون کی منظوری دے دی ہے،سیکرٹری داخلہ

آپ الیکشن کمیشن کو ٹائم لائن دے دیں،ممبربلوچستان الیکشن کمیشن

اسلام آباد (ویب ڈیسک)

الیکشن کمیشن آف پاکستان نے اسلام آباد میں بلدیاتی انتخابات سے متعلق کیس پر فیصلہ محفوظ کرلیا۔الیکشن کمیشن میں وفاقی دارالحکومت اسلام آباد میں بلدیاتی انتخابات کے انعقاد سے متعلق کیس کی سماعت ہوئی۔ ڈی جی لا الیکشن کمیشن نے کہا کہ وفاقی حکومت کو پابند بنایا جائے کہ اسلام آباد میں بلدیاتی انتخابات کے لیے جلد از جلد انتظامات کیے جائیں۔ سیکرٹری داخلہ نے بتایا کہ وفاقی حکومت اسلام آباد کے بلدیاتی اداروں کو مزید اختیارات دینے کے لیے نیا قانون بنا رہی ہے۔ممبر بلوچستان الیکشن کمیشن نے استفسار کیا اس میں کتنا مزید وقت لگے گا۔ جس پر سیکرٹری داخلہ نے بتایا کہ سیکرٹری وزارت قانون سے رابطہ میں ہوں، 6 ماہ تک بلدیاتی انتخابات ہو جائیں گے۔ ممبر سندھ الیکشن کمیشن نے کہا کہ پہلے آپ نے ایک ماہ کہا تھا اور آج 6 ماہ کی بات کر رہے ہیں۔ اس پر سیکرٹری داخلہ نے کہا کہ قانون سازی میں وقت لگتا ہے، وفاقی کابینہ نے نئے قانون کی منظوری دے دی ہے۔ممبر بلوچستان الیکشن کمیشن نے سیکرٹری داخلہ کو مخاطب کرتے ہوئے کہا کہ آپ الیکشن کمیشن کو ٹائم لائن دے دیں۔ الیکشن کمیشن ممبر سندھ نے کہا کہ الیکشن کمیشن اسلام آباد بلدیاتی انتخابات سے متعلق جلد فیصلہ جاری کریگا۔ سیکرٹری داخلہ نے کہا کہ جان بوجھ کر تاخیر نہیں کر رہے، آپ جو بھی ہدایات دینگے وفاقی حکومت تک پہنچا دونگا۔الیکشن کمیشن نے فیصلہ محفوظ کر لیا ۔