اسلام آباد ہائی کورٹ، عافیہ صدیقی بازیابی کیس کا تحریری حکم نامہ جاری ڈاکٹر عافیہ سمجھتی ہیں کہ ان کی فیملی زندہ نہیں، وزارت خارجہ کی عدالت میں جمع کرائی گئی رپورٹ

عافیہ صدیقی فیملی کو امریکی ویزہ دلانے کی پوری کوشش کریں گے تاہم ویزا کی گارنٹی نہیں، حتمی فیصلہ امریکی حکومت کا ہوگا

  اسلام آباد (ویب نیوز)

اسلام آباد ہائی کورٹ نے عافیہ صدیقی بازیابی کیس کا تحریری حکم نامہ جاری کردیا۔ جسٹس سردار اعجاز اسحاق خان نے دو صفحات پر مشتمل تحریری حکمنامہ جاری کیا۔عدالت میں جمع کرائی گئی وزارت خارجہ کی رپورٹ میں کہا گیا کہ ڈاکٹر عافیہ سمجھتی ہیں کہ ان کی فیملی زندہ نہیں ہے۔عدالت نے وزارت خارجہ کو ڈاکٹر عافیہ صدیقی کی فیملی کو امریکا کا ویزہ دلانے میں سہولت فراہم کرنے اورامریکا میں ڈاکٹر عافیہ کی فیملی کے تحفظ کو یقینی بنانے کا حکم دیا۔ دفترخارجہ کے افسر کو عافیہ صدیقی کے خاندان کو اپنا رابطہ نمبر دینے کا حکم بھی دیا گیا۔ اسلام آباد ہائیکورٹ نے کہا کہ وزارت خارجہ کی رپورٹ کے مطابق ڈاکٹر عافیہ سمجھتی ہیں کہ ان کی فیملی زندہ نہیں۔ قونصل جنرل نے فیڈرل میڈیکل سینٹر کا دورہ کیا جہاں ڈاکٹر عافیہ قید ہیں۔رپورٹ میں مزید کہا گیا کہ فیڈرل میڈیکل سینٹر کی وارڈن نے کہا کہ عافیہ صدیقی کال نہ کرنا چاہیں تو زبردستی نہیں کرسکتے۔وزارت خارجہ کے ڈائریکٹر نے کہا  عافیہ صدیقی فیملی کو امریکی ویزہ دلانے کی پوری کوشش کریں گے تاہم ویزا ملنے کی گارنٹی نہیں کیونکہ حتمی فیصلہ امریکی حکومت کا ہوگا۔