حکومت کی طرف سے کئے گئے انتظامات ناکافی،شہریوں میں خوف وہراس
پشاور،لاہور،کوئٹہ (ویب نیوز)
موذی وبا لمپی سکن وائرس کے حملے تیز ہوگئے ، جنوبی پنجاب میں ایک ہزار 547 مویشی متاثر، خیبر پختونخوا میں 7 ہزار 192 اور بلوچستان میں 19 جانور بیماری کی زد میں آگئے ۔ملتان سمیت جنوبی پنجاب کے مختلف اضلاع میں عید قربان کے حوالے سے مویشی منڈیاں سج گئیں جن میں لاکھوں کی تعداد میں قربانی کے جانور موجود ہیں لیکن مو جودہ صورتحال میں لمپی سکن وائرس کے حملوں کے باوجود محکمہ لائیو سٹاک سنجیدہ اور عملی اقدا مات کرنے کو تیار نہیں جس کی وجہ سے وائرس کے شکار مویشیوں کی تعداد 1547 تک پہنچ چکی ہے۔فیصل آباد میں لائیو اسٹاک اور ضلعی انتظامیہ کی جانب سے کئے گئے ناکافی انتظامات کے باعث لمپی سکن اور کانگو وائس کے کیسز میں اضافہ ہونے لگا ہے جبکہ حکام اقدامات اٹھانے میں غیرسنجیدہ دیکھائی دیتے ہیں، خریدار اور بیوپاری دونوں ہی قیمتی مویشیوں کی ہلاکت پر متعلقہ محکموں کی کارکردگی سے حکومت پر بھی نالاں ہیں۔ادھر پشاور کی منڈیوں میں بھی مویشیوں کی آمد کا سلسلہ جاری ہے، تاہم لمپی سکن بیماری سے شہریوں میں خوف پایا جارہا ، منڈیوں میں بیماری سے بچائو کیلئے حفاظتی اقدامات بھی اٹھائے جارہے ۔بلوچستان میں بھی جانوروں کی بیماری لمپی سکن سے 19 ہزار سے زائد متاثر ہو چکے ہیں، لاکھوں جانوروں کو لمپی سکن کی بیماری سے بچانے کے لئے محکمہ امور حیوانات کو فنڈز کی کمی سامنا ہے۔
