مسلم لیگ ن نے ضمنی انتخابات میں شکست تسلیم کر لی
شکست قبول اور کھلے دل سے تحریک انصاف کو مبارک باد دیتے ہیں، ملک احمد
عوام نے پی ٹی آئی کو کیوں ووٹ دیئے،ہمیں جائزہ لینا ہوگا، اگلے لائحہ عمل کے حوالے سے مشاورت ہو رہی ہے
میری ذاتی رائے میں اگر ہم نے 20 نشستیں گنوا دیں تو ہمیں حکومت میں رہنے کا کوئی حق نہیں، لیگی رہنما
لاہور (ویب نیوز)
مسلم لیگ ن نے ضمنی انتخابات میں شکست تسلیم کر لی،مسلم لیگ ن کے رہنما اور سابق وزیر قانون پنجاب ملک احمد خان نے کہا ہے کہ شکست قبول اور کھلے دل سے تحریک انصاف کو مبارک باد دیتے ہیں،میری ذاتی رائے میں اگر ہم نے 20 نشستیں گنوا دیں تو ہمیں حکومت میں رہنے کا کوئی حق نہیں،عوام نے پی ٹی آئی کو کیوں ووٹ دیئے اس کا ہمیں جائزہ لینا ہوگا، ہم اگلے لائحہ عمل سے متعلق دیکھ رہے ہیں، اس حوالے سے مشاورت ہورہی ہے۔ ان خیالات کا اظہار انھوں نے نجی ٹی وی سے گفتگو کرتے ہوئے کیا۔مسلم لیگ ن کے رہنما اور سابق وزیر قانون پنجاب ملک احمد خان نے کہا ہے کہ ہم اپنی شکست کو قبول کرتے ہیں اور کھلے دل سے تحریک انصاف کو مبارک باد دیتے ہیں، ہم تسلیم کرتے ہیں عوام نے پی ٹی آئی کو ووٹ دیے، ہم اپنی شکست کو قبول کرتے ہیں۔ملک احمد خان نے کہا کہ اگر فواد چوہدری یہ کہتے ہیں کہ عوام نے ان کا بیانیہ قبول کیا ہے تو درست کہہ رہے ہیں کیونکہ یہ انتخابی نتائج بھی بتارہے ہیں،ہم نے کوشش کی کہ انتخابات جتنے شفاف ہوسکتے ہیں اتنے شفاف ہوں ہم نے حکومتی مشینری استعمال نہیں کی، عوام نے پی ٹی آئی کو کیوں ووٹ دیئے اس کا ہمیں جائزہ لینا ہوگا، ہم اگلے لائحہ عمل سے متعلق دیکھ رہے ہیں، اس حوالے سے مشاورت ہورہی ہے۔مسلم لیگ ن کے رہنما کا مزید کہنا تھا کہ اگر ہم نے ضمنی انتخابات میں 20 نشستیں گنوا دیں تو میری ذاتی رائے کے مطابق ہمیں حکومت میں رہنے کا کوئی حق نہیں اور عوام کی بات کو تسلیم کیا جانا چاہیے، اگر یہ بات عام انتخابات کی طرف جاتی ہے تو اس کا فیصلہ پارٹی قیادت کرے گی۔
