عمران خان کی جانب سے ہتک آمیز اور انتہائی غیر ضروری بیان پر پاکستان آرمی میں شدید غم و غصہ پایا جاتا ہے ، آئی ایس پی آر آرمی چیف کی تعیناتی کا آئین میں واضح طریقہ کار موجود ،ا س عہدے کو متنازع بنانے کی کوشش انتہائی افسوس ناک عمل ہے

پاک فوج کی سینئر لیڈر شپ کی اہلیت اور حب الوطنی، ان کی دہائیوں پر محیط بے داغ اور شاندار عسکری خدمات سے عیاں ہے

اعلیٰ قیادت کو سیاست میں ملوث کرنے کی کوشش پاکستان کے مفاد میں ہے اور نہ ہی پاک فوج  کے، آئین کی بالادستی کے عزم پر قائم ہیں، بیان

راولپنڈی (ویب نیوز)

پاک فوج کے شعبہ تعلقات عامہ آئی ایس پی آر نے کہا ہے کہ فیصل آباد میں ہونے والے سیاسی جلسے کے دوران چیئرمین پی ٹی آئی کی جانب سے پاک فوج کی سینئر قیادت کے بارے میں ہتک آمیز اور انتہائی غیر ضروری بیان پر پاکستان آرمی میں شدید غم و غصہ پایا جاتا ہے، آرمی چیف کی تعیناتی کا آئین میں واضح طریقہ کار موجود ،ا س عہدے کو متنازع بنانے کی کوشش انتہائی افسوس ناک عمل ہے۔ فوج کے شعبہ تعلقات عامہ( آئی ایس پی آر) کی جانب سے جاری کردہ بیان میں کہا گیا ہے کہ ایک ایسے وقت میں پاک فوج کی سینئر قیادت کو متنازع بنانے کی کوشش انتہائی افسوس ناک ہے جبکہ پاک فوج قوم کی سیکیورٹی اور حفاظت کے لیے ہر روز جانیں قربان کر رہی ہے۔ بیان میں کہا گیا ہے کہ آرمی چیف کی تعیناتی کا آئین میں واضح طریقہ کار موجود ہے، اس کے باوجود سینئر سیاست دانوں کی جانب سے اس عہدے کو متنازع بنانے کی کوشش انتہائی افسوس ناک عمل ہے، پاک فوج کی سینئر لیڈر شپ کی اہلیت اور حب الوطنی، ان کی دہائیوں پر محیط بے داغ اور شاندار عسکری خدمات سے عیاں ہے۔ آئی ایس پی آر کے مطابق پاک فوج کی اعلی قیادت کو سیاست میں ملوث کرنے کی کوشش اور آرمی چیف کی تعیناتی کے طریقہ کار کو متنازع بنانا نہ پاکستان کے مفاد میں ہے اور نہ ہی پاک فوج کے مفاد میں ہے، پاکستان آرمی اسلامی جمہوریہ پاکستان کے آئین کی بالادستی کے عزم پر قائم ہے۔