وزیر اعظم نے متعلقہ وزرا کمیٹی کو کسان نمائندوں کے ساتھ مل کر قابل عمل سفارشات جلد پیش کرنے کی ہدایت کی
اسلام آباد (ویب نیوز)
وزیراعظم سے کسانوں کے مختلف وفود کی الگ الگ ملاقاتیں،مسائل اور مطالبات سے آگاہ کیا، وزیراعظم شہباز شریف نے کہا کہ زرعی شعبے کی ترقی کے لیے حکومت اگلے ہفتے تاریخی کسان پیکج کا اعلان کرے گی۔وزیراعظم آفس کی جانب سے جاری اعلامیہ کے مطابق وزیر اعظم محمد شہباز شریف نے کسانوں کے مختلف وفود سے ان کے مسائل کے حل کے لیے الگ الگ ملاقاتیں کیں۔ان ملاقاتوں میں وزیر داخلہ رانا ثنااللہ خان، وزیرخوراک طارق بشیر چیمہ، رکن صوبائی اسمبلی پنجاب رانا مشہود احمد خان اورمتعلقہ اعلیٰ سرکاری حکام نے بھی شرکت کی۔ وزیر اعظم نے زراعت کو ملکی معیشت کی ریڑھ کی ہڈی قرار دیتے ہوئے اسے ملک کی سماجی و معاشی ترقی کے لیے انتہائی اہم قرار دیا۔وزیر اعظم نے متعلقہ وزرا کی کمیٹی کو کسان نمائندوں کے ساتھ مل کر ان کے مسائل موثر انداز میں حل کرنے کے لیے قابل عمل سفارشات جلد از جلد پیش کرنے کی ہدایت کی۔ وزیر اعظم نے ان سفارشات کی روشنی میں ملک میں زرعی شعبے کی ترقی اور کسانوں کی فلاح و بہبود کو یقینی بنانے کے لیے موجودہ معاشی حالات کے پیش نظر ہر ممکن ریلیف فراہم کرنے کے عزم کا اظہار کیا۔ انہوں نے اس سلسلے میں اگلے ہفتے منعقد ہونے والی کسان کانفرنس میں تاریخی کسان پیکج دینے کا اعلان کیا۔ وزیر اعظم نے انہیں اپنے خادم اعلیٰ پنجاب کی حیثیت سے زرعی شعبے کی ترقی اور کسان بھائیوں کی فلاح و بہبود کے لیے اٹھائے گئے اقدامات کا حوالہ دیتے ہوئے یاد کرایا کہ انہوں نے کس طرح ہمیشہ کسانوں کے مفادات کا تحفظ کیا، اور انہیں بجلی کے بلوں کی ادائیگی، کھاد کی فراہمی اور زرعی آلات کی خریداری پر سبسڈی فراہم کی۔
