پاک جرمن وزرائےخارجہ کی پریس کانفرنس پر بھارتی ریمارکس مسترد  پاک جرمن وزرائے خارجہ نے جموں و کشمیر تنازعہ پر اتفاق کیا کہ پرامن اور منصفانہ حل کے حوالے سے اقوام متحدہ کی تیز تر کوششوں کی ضرورت ہے۔

آسلام آباد (ویب نیوز )

ترجمان دفتر خارجہ نے برلن میں پاکستان اور جرمن وزرائے خارجہ کی مشترکہ پریس کانفرنس پر بھارتی وزارت خارجہ کے ترجمان کے غیر ضروری ریمارکس مسترد کردیے۔

ترجمان کے مطابق جموں و کشمیر تنازعہ کی مرکزیت کو اجاگر کرتے ہوئے، پاکستان اور جرمن وزرائے خارجہ نے اس پر اتفاق کیا کہ مسئلے کے پرامن اور منصفانہ حل کے حوالے سے عالمی برادری کے کردار اور ذمہ داری کے ساتھ اقوام متحدہ کی تیز تر کوششوں کی ضرورت ہے۔

ترجمان کا کہنا تھا کہ جب بھی مقبوضہ جموں و کشمیر میں بھارتی غیر قانونی قبضے کی جانچ پڑتال کا مطالبہ ہوتا ہے ، بھارت سرحد پاردہشت گردی کے جھوٹ کا سہارا لیتا ہے یہ بات ڈھکی چھپی نہیں کہ بھارت خود پاکستان میں سرحد پار دہشت گردی اور مقبوضہ جموں و کشمیر میں ریاستی دہشت گردی کا مرتکب ہے۔

ترجمان نے دوٹوک پیغام دیا کہ پاکستان اور جرمن وزرائے خارجہ کی پریس کانفرنس کے بارے میں مضحکہ خیز ریمارکس کی بجائے بھارت مقبوضہ کشمیر میں بین الاقوامی برادری کے جائز خدشات کو دور کرے اور اپنے طرز عمل کو درست کرے۔