ایک ایک انچ پر ریاست کی مکمل رٹ برقرار رکھیں گے، قومی سلامتی کمیٹی کا عزم تیز رفتار اقتصادی بحالی اور روڈ میپ پر اتفاق رائے کے لیے تمام اسٹیک ہولڈرز کو شامل کیاجائے گا، اجلاس میں اتفاق

• اپنے لوگوں کے تحفظ کے تمام حقوق محفوظ رکھتے ہیں،کسی بھی ملک کو دہشت گردوں کو پناہ گاہیں اور سہولتیں فراہم کرنے کی اجازت نہیں دی جائے گی، شرکا کا دو ٹوک اعلان
• قومی، داخلی ،سلامتی پالیسی کے مطابق عوام پر مرکوز سماجی و اقتصادی ترقی کو ترجیح دی جائے گی، وزیراعظم شہباز شریف
• وزیراعظم کی زیرصدارت قومی سلامتی کمیٹی کا اجلاس، عسکری قیادت،متعلقہ وفاقی وزرا نے شرکت کی، اعلامیہ جاری

اسلام آباد (ویب نیوز)

قومی سلامتی کمیٹی نے اس عزم کا اظہار کیا ہے کہ ایک ایک انچ پر ریاست کی مکمل رٹ برقرار رکھی جائے گی اور پوری طاقت کے ساتھ دہشتگردی سے نمٹا جائے گا، اپنے لوگوں کے تحفظ کے تمام حقوق محفوظ رکھتے ہیں،کسی بھی ملک کو دہشت گردوں کو پناہ گاہیں اور سہولتیں فراہم کرنے کی اجازت نہیں دی جائے گی جبکہ  تیز رفتار اقتصادی بحالی اور روڈ میپ کو حاصل کرنے بارے اتفاق رائے کے لیے تمام اسٹیک ہولڈرز کو شامل کرنے پر اتفاق کیا گیا۔ اعلامیہ کے مطابق قومی سلامتی کمیٹی کا 40 واں اجلاس وزیر اعظم شہباز شریف کی زیر صدارت پیر کے روز اسلام آباد میں ہوا۔  اجلاس میں وفاقی کابینہ کے متعلقہ ارکان، چیئرمین جوائنٹ چیفس آف اسٹاف کمیٹی، تمام سروسز چیفس اور انٹیلی جنس سروسز کے سربراہان نے شرکت کی۔ فورم نے اس بات پر زور دیا کہ جامع ‘قومی سلامتی’ معاشی سلامتی کے گرد گھومتی ہے  خودمختاری اور معاشی آزادی کے بغیر خودمختاری یا وقار دبائو میں آتا ہے۔ قومی سلامتی کمیٹی   نے پاکستان کے عام لوگوں بالخصوص کم اور متوسط آمدنی والے طبقے کو درپیش چیلنجز کے حوالے سے جاری معاشی صورتحال کا ایک جامع جائزہ لیا۔  وزیر خزانہ نے فورم کو حکومت کے معاشی استحکام کے روڈ میپ کے بارے میں آگاہ کیا۔ اعلامیہ کے مطابق معیشت کو مضبوط بنانے کے لیے کمیٹی نے ٹھوس اقدامات اٹھانے پر اتفاق کیا جس میں درآمدات کو معقول بنانے کے ساتھ ساتھ غیر قانونی کرنسی کے اخراج اور حوالات کے کاروبار کی روک تھام بھی شامل ہے۔  اعلامیہ میں بتایا گیا کہ   خاص طور پر زرعی پیداوار اور مینوفیکچرنگ سیکٹر کو بہتر بنانے پر زور دیا جائے گا تاکہ غذائی تحفظ، درآمدات کے متبادل اور روزگار کو یقینی بنایا جا سکے۔   عوام پر مبنی اقتصادی پالیسیاں جن کے اثرات عام لوگوں پر ہوں گے ترجیح رہے گی۔  فیصلہ موثر اور تیز رفتار اقتصادی بحالی اور روڈ میپ کو حاصل کرنے کے لیے اتفاق رائے کے لیے تمام اسٹیک ہولڈرز کو شامل کرنے پر بھی اتفاق کیا گیا۔ 33 ملین سیلاب متاثرین کے چیلنجوں کو کم کرنے کی کوششوں کو مدنظر رکھتے ہوئے، فورم نے صوبائی حکومتوں اور کثیر الجہتی مالیاتی اداروں کے ساتھ مل کر ان کی بحالی اور تعمیر نو کے لیے تمام وسائل کو متحرک کرنے کا عزم کیا۔  فورم نے وزیر اعظم اور وفاقی اکائیوں کی قیادت میں جاری امدادی کوششوں کو بھی سراہا۔ کمیٹی کو ملک کی سیکیورٹی صورتحال سے بھی آگاہ کیا گیا جس میں خاص طور پر کے پی کے اور بلوچستان میں حالیہ دہشت گردی کے واقعات پر توجہ دی گئی۔  وزیر اعظم نے زور دے   کر کہا کہ دہشت گردی کے خلاف جنگ کی قیادت وفاقی اور صوبائی حکومتیں نیشنل ایکشن پلان کے مطابق کریں گی اور قومی داخلی سلامتی پالیسی کے مطابق عوام پر مرکوز سماجی و اقتصادی ترقی کو ترجیح دی جائے گی جبکہ مسلح افواج پرعزم ڈیٹرنس اور محفوظ اور سازگار ماحول فراہم کریں گی۔ صوبائی ایپکس کمیٹیوں کو پوری سنجیدگی کے ساتھ بحال کیا جا رہا ہے، ایل ای اے خاص طور پر سی ٹی ڈی کو مطلوبہ صلاحیتوں کے ساتھ لڑائی کے مطلوبہ معیار تک لایا جائے گا۔ اعلامیہ  میں  کہا   گیا  ہے  کہ  کسی بھی ملک کو دہشت گردوں کو پناہ گاہیں اور سہولتیں فراہم کرنے کی اجازت نہیں دی جائے گی، پاکستان اس سلسلے میں اپنے لوگوں کے تحفظ کے تمام حقوق محفوظ رکھتا ہے۔ این ایس سی نے پاکستان میں دہشت گردی کے لیے زیرو ٹالرنس کے اپنے عزم کا اعادہ کیا۔. این ایس سی نے تشدد کا سہارا لینے والے کسی بھی اور تمام اداروں کے خلاف کارروائی کرنے کے اپنے عزم کا اعادہ کیا۔  ریاست کی پوری طاقت کے ساتھ دہشتگردی سے نمٹا جائے گا۔  پاکستان کی سلامتی پر کوئی سمجھوتہ نہیں کیا جا سکتا اور پاکستان کی سرزمین کے ایک ایک انچ پر ریاست کی مکمل رٹ برقرار رکھی جائے گی۔