پنجاب الیکشن کیلئے فنڈز فراہمی، سپریم کورٹ نے وزارت خزانہ سے رپورٹ طلب کرلی الیکشن کمیشن کی جانب سے فنڈز فراہمی سے متعلق رپورٹ عدالت عظمیٰ میں جمع کروا دی گئی

اسلام آباد (ویب نیوز)

سپریم کورٹ نے پنجاب میں انتخابات کے لیے فنڈز کی فراہمی کے معاملے پر وزارت خزانہ سے رپورٹ طلب کرلی۔ ذرائع کے مطابق عدالت عظمی نے پنجاب میں انتخابات کے لیے 21ارب روپے کے اجراء کے معاملے پر وزارت خزانہ سے بھی رپورٹ طلب کرلی ہے۔سپریم کورٹ رجسٹرار آفس کی جانب سے وزارت خزانہ کو نوٹس بھجوادیا گیا ہے۔ عدالت کے خصوصی میسنجر نے نوٹس وزارت خزانہ کو بھجوایا ہے۔ ذرائع کے مطابق عدالتی نوٹس پر وزارت خزانہ کی رپورٹ تاحال رجسٹرار آفس سپریم کورٹ نہیں پہنچی، جس پر عدالت کی جانب سے نوٹس بھیجا گیا ہے۔قبل ازیں الیکشن کمیشن کی جانب سے فنڈز فراہمی سے متعلق رپورٹ سپریم کورٹ میں جمع کروا دی گئی۔ذرائع کے مطابق انتخابات کے لیے فنڈز کے اجرا سے متعلق رپورٹ الیکشن کمیشن نے گزشتہ شب سپریم کورٹ میں جمع کروائی۔ الیکشن کمیشن کی 2 صفحات پر مشتمل پیش رفت رپورٹ میں فنڈز کی عدم فراہمی کا ذکر کیا گیا ہے۔واضح رہے کہ سپریم کورٹ نے فنڈز سے متعلق رپورٹ کے لیے سیکرٹری الیکشن کمیشن کو نوٹس جاری کیا تھا، جس میں پنجاب اور خیبرپختونخوا کے الیکشن کے حوالے سے فنڈز ملنے یا نہ ملنے کے حوالے سے آگاہ کرنے کی ہدایت کی گئی تھی۔عدالتی نوٹس پر الیکشن کمیشن کی جانب سے سپریم کورٹ کو آگاہ کیا گیا کہ انتخابات کے لیے فنڈز نہیں مل سکے۔