پاکستان کا زمین سے زمین تک مار کرنے والے بیلسٹک میزائل شاہین ٹو کا کامیاب تجربہ
تربیتی لانچ کا مشاہدہ سٹرٹیجک پلانز ڈویژن، آرمی سٹریٹجک فورسز کمانڈ، سائنسدانوں او ر انجینئرز کے سینئرافسران نے کیا
صدر مملکت ، وزیر اعظم ،چیئرمین جوائنٹ چیفس آف سٹاف کمیٹی اورسروسزچیفس کی سائنسدانوں اور انجینئرز کو مبارکباد
راولپنڈی(ویب نیوز)
پاکستان نے زمین سے زمین تک مار کرنے والے بیلسٹک میزائل شاہین ٹو کا کامیاب تجربہ کرلیا۔ پاک فوج کے شعبہ تعلقات عامہ (آئی ایس پی آر) کے مطابق تربیتی لانچ کا مقصد ٹروپس کی تربیت، مختلف تکنیکی پیرامیٹرز کی توثیق کا جائزہ لینا تھا، اس کا مقصد بہتر درستگی اور بہتر بقا کے لئے شامل مختلف ذیلی نظاموں کی کارکردگی کا جائزہ لینا بھی تھا، سائنسدانوں نے اس تاریخی کامیابی میں اپنا حصہ ڈالا۔آئی ایس پی آر کے مطابق تربیتی لانچ کا مشاہدہ سٹرٹیجک پلانز ڈویژن، آرمی سٹریٹجک فورسز کمانڈ، سائنسدانوں او رسٹرٹیجک تنظیموں کے انجینئرز کے سینئر افسران نے کیا، ڈائریکٹر جنرل سٹرٹیجک پلانز ڈویژن نے سائنسدانوں کی تکنیکی صلاحیت، لگن اور عزم کو سراہا۔آئی ایس پی آر کے مطابق صدر مملکت آصف زرداری اور وزیر اعظم شہباز شریف نے سائنسدانوں اور انجینئرز کو اس کامیابی پر مبارکباد دی، چیئرمین جوائنٹ چیفس آف اسٹاف کمیٹی اور سروسز چیفس نے کامیاب تجربے پر مبارکباد پیش کی۔
