خیبرپختونخوا میں 2مختلف آپریشنز ،15دہشتگرد ہلاک،لیفٹیننٹ محمد حسن اشرف سمیت4جوان شہید
صدر وزیراعظم کی دہشت گردوں کی ہلاکت پر فوجی جوانوں کی تحسین اور دہشت گردی کے خاتمہ تک جدوجہد جاری رکھنے کا عزم
راولپنڈی ( ویب نیوز )
سیکیورٹی فورسز نے خیبرپختونخوا میں 2مختلف آپریشنز میں 15دہشتگردوں کو ہلاک کردیا جبکہ فائرنگ کے تبادلے میں لیفٹیننٹ محمد حسن اشرف سمیت 4 جوان شہید ہوگئے۔ پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق ضلع ڈیرہ اسماعیل خان کے علاقے ہتھالہ میں انٹیلی جنس کی بنیاد پر آپریشن کیا گیا جہاں خوارج کی موجودگی کی اطلاع ملی تھی۔ بیان کے مطابق دورانِ آپریشن، سیکیورٹی فورسز نے خوارج کے ٹھکانے کو مؤثر انداز میں نشانہ بنایا، جس کے نتیجے میں 9خوارج، بشمول ان کے سرغنہ ہلاک ہو گئے۔ ترجمان پاک فوج کے مطابق مارے جانے والوں میں دہشتگردوں کے رِنگ لیڈر فارمان عرف ثاقب، خارجی امان اللہ عرف توری، خارجی سعید عرف لیاقت خارجی بلال شامل ہیں۔ بیان کے مطابق یہ تمام دہشتگرد علاقے میں متعدد تخریبی سرگرمیوں میں ملوث اور قانون نافذ کرنے والے اداروں کو مطلوب تھے، ایک اور کارروائی میں، شمالی وزیرستان کے علاقے میران شاہ میں سیکیورٹی فورسز نے 6 دہشتگردوں کو ہلاک کردیا۔ آئی ایس پی آر کے مطابق دہشتگردوں سے فائرنگ کے شدید تبادلے میں پاک فوج کے لیفٹیننٹ محمد حسن اشرف سمیت 4 جوان شہید ہوگئے، شہدا میں نائب صوبیدار محمد بلال، سپاہی فرحت اللہ اور سپاہی ہمت خان شامل ہیں۔ ترجمان کا کہنا ہے کہ سیکیورٹی فورسز کا ممکنہ خارجیوں کے خاتمے کے لیے کلیئرنس آپریشنز جاری ہے، سیکیورٹی فورسز دہشتگردی کے خاتمے کے لیے پرعزم ہیں۔ بہادر جوانوں کی قربانیاں ہمارے عزم کو مزیدتقویت دیتی ہیں۔ خیال رہے کہ 2روز قبل سیکیورٹی فورسز نے خیبرپختونخوا کے علاقوں میں 5 مختلف کارروائیوں کے دوران 13خارجی دہشتگردوں کو ہلاک کیا تھا۔ سیکیورٹی فورسز کی جانب سے ڈیرہ اسماعیل خان، وزیرستان، لکی مروت اور خیبر کے علاقوں میں آپریشن کیے گئے، دہشتگردوں کی موجودگی کی خفیہ اطلاع پر کارروائیاں کی گئی تھیں۔ دوسری جانب صدر مملکت آصف علی زرداری ، وزیراعظم شہباز شریف اور وفاقی وزیر داخلہ محسن نقوی نے خیبرپختونخوا میں خوارج کیخلاف کامیاب آپریشن پر سیکیورٹی فورسز کی پذیرائی کی اور سیکیورٹی فورسز کے افسران اور اہلکاروں کی پیشہ ورانہ صلاحیتوں کی تعریف کی ہے۔ صدر اور وزیر اعظم نے دہشت گردوں کی ہلاکت پر فوجی جوانوں کی تحسین اور اس عزم کا اظہار کیا کہ دہشت گردی کے خاتمہ تک جدوجہد جاری رہے گی ۔وزیراعظم نے شہید لیفٹیننٹ محمد حسن اشرف اور 3سپاہیوں کو خراج عقیدت پیش کیا اور شہدا کی بلندی درجات اور ان کے اہلخانہ کے لیے صبر کی دعا کی۔شہباز شریف نے کہا کہ مجھ سمیت پوری قوم کو اپنے شہدا اور ان کے اہل خانہ پر فخر ہے، دہشتگردی کے ملک سے مکمل خاتمے تک اس کے خلاف جنگ جاری رکھیں گے۔ انہوں نے مزید کہا کہ افواج پاکستان جان کی پرواہ کئے بغیر وطن کی حفاظت کے لیے دن رات مصروف عمل ہیں، پاکستانی قوم اپنی بہادر افواج کے غیر متزلزل عزم پر انہیں سلام پیش کرتی ہے۔ وفاقی وزیر داخلہ محسن نقوی نے خیبرپختونخوا میں کامیاب آپریشن پر سیکیورٹی فورسز کو خراج تحسین پیش کیا جبکہ انہوں نے شہید لیفٹیننٹ محمد حسان اشرف سمیت 4جوانوں کو زبردست الفاظ میں خراج عقیدت پیش کیا ہے۔ محسن نقوی نے کہا کہ شہدا نے جان دیکر دہشتگردوں کے مذموم عزائم کو ناکام بنایا، شہدا کی عظیم قربانیوں کو ہمیشہ یاد رکھا جائے گا، قوم شہدا کی قربانیوں کی ہمیشہ مقروض رہے گی۔وزیر داخلہ کا مزید کہنا تھا کہ قوم کو سیکیورٹی فورسز کی پیشہ وارانہ صلاحیتوں اورجرات پر فخر ہے، خیبرپختونخوا میں قیام امن کے لیے سیکیورٹی فورسز کے اقدامات قابل تعریف ہیں، قوم دہشتگردوں کے خاتمے کے لیے سیکیورٹی فورسز کے شانہ بشانہ کھڑے ہیں۔
