بھارت کی بلا اشتعال فائرنگ… پاک فوج کا منہ توڑ جواب، دشمن خاموش
مقبوضہ جموں و کشمیر کی فضائی حدود میں بھارتی رافیل طیارے پاک فضائیہ کی بروقت کارروائی کے خوف سے ہی فرار ہو گئے
ذرائع کا کہنا ہے کہ جیسے ہی بھارتی رافیل طیارے فضا میں متحرک ہوئے پاکستان ایئر فورس نے فوراً ان کی نشاندہی کر لی اور بروقت ردعمل دیتے ہوئے اپنی فضائی نگرانی کو فعال کر دیا، پاکستانی طیاروں کی تیز اور مؤثر کارروائی نے بھارتی طیاروں کو ہکا بکا کر دیا اور وہ بوکھلاہٹ میں اپنی فضائی حدود کے اندر واپس پلٹنے پر مجبور ہو گئے۔
سکیورٹی حکام کا کہنا ہے کہ پاکستان کی فضائیہ نے نہ صرف دشمن کی ہر حرکت پر کڑی نظر رکھی بلکہ فوری حکمت عملی کے تحت اپنی فضائی برتری کا مظاہرہ بھی کیا۔
سکیورٹی ذرائع نے واضح پیغام دیا کہ پاکستانی افواج ہر قسم کی بھارتی جارحیت کا منہ توڑ جواب دینے کے لیے مکمل طور پر تیار اور چوکس ہیں۔
یہ واقعہ ایسے وقت پر پیش آیا جب خطے میں پہلے ہی کشیدگی بڑھ رہی اور کسی بھی غلط اقدام سے صورتحال بڑے تصادم کی شکل اختیار کر سکتی ہے۔
دوسری جانب دفاعی مبصرین کا کہنا ہے کہ بھارت کی جانب سے ایسی حرکات غیر ذمہ دارانہ ہیں اور خطے کے امن کیلئے خطرہ بن سکتی ہیں۔
پاکستان نے دنیا کو ایک بار پھر یہ پیغام دیا ہے کہ وہ نہ صرف اپنے دفاع کیلئے مکمل تیار ہے بلکہ کسی بھی قسم کی مہم جوئی کا منہ توڑ اور فوری جواب دینے کی بھرپور صلاحیت رکھتا ہے۔
