مولانا فضل الرحمان کی درخواست پر ٹی ایل پی اور حکومت کے درمیان مذاکرات شروع
ٹی ایل پی کا معاملہ افہام و تفہیم سے حل کیا جائے، مولانا فضل الرحمان کا مریم نواز اور رانا ثنا اللہ سے رابطہ
اسلام آباد( ویب نیوز)
جے یو آئی کے سربراہ مولانا فضل الرحمان نے وزیراعلی پنجاب مریم نواز اور رانا ثنا اللہ سے رابطہ کیا ہے اور کہا ہے کہ تحریک لبیک کا معاملہ خوش اسلوبی کے ساتھ حل کیا جائے۔ٹی ایل پی کے احتجاج اور پنجاب میں امن و امان کی خراب صورتحال پر سربراہ جے یو آئی مولانا فضل الرحمان متحرک ہوگئے اور انہوں نے وزیراعلی پنجاب مریم نواز سے ٹیلیفونک رابطہ کیا۔میڈیا رپورٹس کے مطابق مولانا نے وفاقی حکومت کے نمائندے رانا ثنا اللہ سے بھی رابطہ کیا اور دونوں سے علیحدہ علیحدہ درخواست کی کہ وفاق اور پنجاب حکومت ٹی ایل پی کے احتجاج کے معاملہ کو پرامن طریقے سے سلجھائے، اس معاملے کو خوش اسلوبی اور افہمام و تفہیم کے ساتھ مل بیٹھ کر حل کیا جائے، ملکی حالات تصادم کے متحمل نہیں۔ذرائع کے مطابق مولانا فضل الرحمان کی درخواست کے بعد ٹی ایل پی اور حکومت کے درمیان مذاکرات شروع ہوگئے ہیں۔دوسری جانب ٹی ایل کا قافلہ مرید کے پہنچ گیا جہاں شرکا آج رات قیام کریں گے۔
