سیالکوٹ  واقعہ پر پاکستان سے تعلقات میں کوئی فرق نہیں آئیگا، سری لنکن ہائی کمشنر  امید ہے پاکستان مستقبل میں ایسے واقعات کو روکنے کے لیے ٹھوس اقدامات کرے گا

وجے وکرما کی سپریم کورٹ بار ایسوسی کے وفد سے ملاقات میں گفتگو

اسلام آباد (ویب ڈیسک)

سری لنکن ہائی کمشنر موہن وجے وکرما نے کہا ہے کہ   سیالکوٹ واقعہ پر پاکستان سے تعلقات میں کوئی فرق نہیں آئے گا۔سپریم کورٹ بار ایسوسی ایشن کے وفد نے سینیٹر علی ظفر کی قیادت میں سری لنکا کے ہائی کمشنر سے ملاقات کی اور شہری  پریانتھاکمارا کی ہلاکت پر تعزیت کی۔ اس موقع پر سری لنکن ہائی کمشنر نے کہاکہ پاکستان اور سری لنکا پرانے دوست ہیں، سری لنکا اور پاکستان نے ایک ہی عرصے میں آزادی حاصل کی، پاکستان نے ہمیشہ سری لنکا کا ساتھ دیا   اور ہم ہمیشہ پاکستان کے ساتھ ہیں جب کہ سری لنکا کی عوام پاکستان کے عمل سے مطمئن ہیں، بزنس کمیونٹی اور سیالکوٹ کے تاجروں نے پریانتھا کے خاندان کے لیے جو کیا اس پر مشکور ہیں۔سری لنکن ہائی کمشنر نے کہا کہ جن پاکستانیوں نے ہمارا ساتھ دیا اس پر ان کے مشکور ہیں، اس کے علاوہ وزیراعظم اور تمام جماعتوں کی جانب سے جو رد عمل آیا اس پر مطمئن ہیں۔ انہوں نے کہا کہ پاکستان اور سری لنکا کے تعلقات میں اس واقعے سے کوئی فرق نہیں آئے گا تاہم امید ہے پاکستان مستقبل میں ایسے واقعات کو روکنے کے لیے ٹھوس اقدامات کرے گا۔