بھارتی فوجی آپریشن، 10 دنوں میں25 سو کشمیری گرفتار
75 کشمیری کسی عدالتی کارروائی کے بغیر دوسال کے لیے جیل منتقل
سری نگر(ویب نیوز )
مقبوضہ جموں وکشمیر میں جاری بھارتی فوجی آپریشن میں گزشتہ 10 دنوں میں25 سو سے زیادہ کشمیری گرفتار کر لیے گئے ہیں ان میں سے 75 کشمیریوں کو کالے قانون پبلک سیفٹی ایکٹ(پی ایس اے) کے تحت کسی عدالتی کارروائی کے بغیر دوسال کے لیے جیل بھیج دیا گیا ہے ۔بھارتی فورسز اہلکاروں نے 22اپریل کو پیش آنے والے پہہلگام واقعے کے بعد مقبوضہ علاقے میں مسلسل محاصرے اور تلاشی کی کارروائیوں اور چھاپوں کے دوران اب تک 25سو سے زائد افراد کو گرفتار جبکہ تقریبا تین درجن گھروں کو مسمار کیا ہے۔انسپکٹر جنرل پولیس کشمیر زون وی کے بردی نے تصدیق کی ہے کہ گرفتار کیے گئے افراد میں سے 75 پر پی ایس اے لاگو کیا گیا ہے۔ اس قانون کے تحت بغیر مقدمہ چلائے کسی کو کم از کم دو برس تک قید میں رکھا جاسکتا ہے۔بھارتی فورسز کی طرف سے بانڈی پورہ، کپواڑہ، بارہمولہ، گاندربل، بڈگام، شوپیاں، کولگام، اسلام آباد، پلوامہ، کشتواڑ، ڈوڈہ، راجوری اور پونچھ اضلاع میں بڑے پیمانے پر محاصرے اور تلاشی کی کارروائیوںکا سلسلہ جاری ہے
