بھارت کو بھی کشمیر سمیت تمام تنازعات کے حل کی طرف آنا ہوگا۔ زرداری ، شہباز شریف ہم یومِ آزادی بڑے افتخار اور ایک  تازہ امید کے ساتھ منا رہے ہیں۔ حال ہی میں ہماری قوم نے بیرونی جارحیت کے جواب میں اپنی طاقت، عزم اور اتحاد کا مظاہرہ کیا۔

معرکہ حق اور آپریشن بنیان مرصوص میں ہماری فتح ہماری تاریخ کا ایک سنہری باب ہے، یہ کامیابی غیر متزلزل قومی عزم، بے مثال پیشہ ورانہ مہارت اور اتحاد کا ثبوت ہے،صدر وزیراعظم 

یہ دن ہمیں اس جرات، اتحاد اور قربانیوں کی یاد دلاتا ہے جن کی بدولت ہمیں آزادی کی نعمت نصیب ہوئی۔  قائداعظم محمد علی جناح کی کاوشوں اور قربانیوں نے اس خواب کو حقیقت بنایا. صدر مملکت 

دفاع کی طرح معاشی طورپر ناقابل تسخیر ہونا، قومی دفاع اور سالمیت کا ایک بہت بڑی ضرورت ہے جس کے لئے ہم سب کو معرکہ حق اور تحریک پاکستان جیسے پرخلوص جذبے کی ضرورت ہے۔ وزیراعظم

اسلام آباد(ما نیٹرنگ ڈیسک ) 

صدر مملکت آصف علی زرداری اور وزیراعظم شہباز شریف نے کہاکہ پاکستان خطے اور دنیا میں پرامن بقائے باہمی اور بات چیت کے سفارتی ذرائع سے مسائل کے حل پر یقین ر کھتا ہے  بھارت کو بھی اسی جذبے سے جموں وکشمیر سمیت تمام تنازعات کے حل کی طرف آنا ہوگا۔ مادرِ وطن کی آزادی کی 78 ویں سالگرہ کے موقع پر اپنے الگ الگ پیغامات انہوںنے کہاکہ معرکہ حق اور آپریشن بنیان مرصوص میں ہماری فتح ہماری تاریخ کا ایک سنہری باب ہے۔ یہ کامیابی غیر متزلزل قومی عزم، بے مثال پیشہ ورانہ مہارت اور پوری قوم کے اتحاد کا ثبوت ہے۔صدر مملکت آصف علی زرداری نے 14 اگست 2025*میں مادرِ وطن کی آزادی کی 78 ویں سالگرہ کے موقع پر پاکستان اور دنیا بھر میں بسنے والے تمام پاکستانیوں کو دل کی گہرائیوں سے مبارکباد پیش کر تے ہوئے کہاکہ یہ دن ہمیں اس جرات، اتحاد اور قربانیوں کی یاد دلاتا ہے جن کی بدولت ہمیں آزادی کی نعمت نصیب ہوئی۔انہوں نے کہا آج ہم اپنے عظیم قائد، قائداعظم محمد علی جناح اور تحریکِ پاکستان کے تمام کارکنان کو خراجِ عقیدت پیش کرتے ہیں، جن کی کاوشوں اور قربانیوں نے اس خواب کو حقیقت بنایا۔صدر نے کہا کہ اس سال ہم یومِ آزادی بڑے افتخار اور ایک  تازہ امید کے ساتھ منا رہے ہیں۔ حال ہی میں ہماری قوم نے بیرونی جارحیت کے جواب میں اپنی طاقت، عزم اور اتحاد کا مظاہرہ کیا۔ انہوں نے کہاکہ معرکہ حق اور آپریشن بنیان مرصوص میں ہماری فتح ہماری تاریخ کا ایک سنہری باب ہے۔ یہ کامیابی غیر متزلزل قومی عزم، بے مثال پیشہ ورانہ مہارت اور پوری قوم کے اتحاد کا ثبوت ہے۔ بھارت کی بلاجواز جارحیت کے جواب میں ہم نے تحمل، حکمت اور بھرپور قوت سے اپنے وطن کا دفاع کیا۔ دنیا نے دیکھا کہ پاکستان امن چاہتا ہے، مگر اپنی خودمختاری اور علاقائی سالمیت کے تحفظ کی مکمل صلاحیت رکھتا ہے۔یہ فتح ہمارے عوام کے لیے نئے اعتماد کا ذریعہ بنی ہے۔ اس نے قوم کے حوصلے بلند کیے، اداروں پر اعتماد مزید مضبوط کیا اور پاکستان کے عالمی مقام کو مزید مستحکم کیا۔صدر نے کہاکہ  آج دنیا پاکستان کو ایک ایسے ملک کے طور پر دیکھتی ہے جو امن کا خواہاں ہے مگر دباو کے آگے نہیں جھکتا۔ لیکن یہ لمحہ صرف عسکری کامیابی نہیں، بلکہ اس امر کی بھی یاددہانی کراتا ہے کہ جب ہم متحد، یکسو اور ایک مشترکہ مقصد کے لیے پرعزم ہوں تو ہم ہر شعبے میں کامیابی حاصل کر سکتے ہیں۔ اب ہمیں اسی جذبے کو اپنی معاشی بحالی، تعلیمی اصلاحات، تکنیکی ترقی، ادارہ جاتی اصلاحات اور ماحولیاتی تحفظ کی جانب لگانا ہوگا۔ یہی نظم، جرات اور حکمت جو بھارت کے خلاف حالیہ کامیابی کا باعث بنی، ہمیں غربت کے خاتمے، عوام کے لیے مواقع پیدا کرنے اور ایک منصفانہ اور ہمہ گیر معاشرہ قائم کرنے میں بھی کامیابی سے ہمکنار کر سکتی ہے۔ صدر مملکت نے کہاکہ اس دن ہم بھارتی زیرِ قبضہ جموں و کشمیر کے عوام کے ساتھ اظہارِ یکجہتی بھی کرتے ہیں۔ ان کی جرات، انصاف اور حقِ خودارادیت کی جدو جہد ہمارے دل کے قریب ہے۔ پاکستان ان کے حقِ خودارادیت کے حصول تک کشمیروں کو غیر متزلزل سفارتی، اخلاقی اور سیاسی حمایت فراہم کرتا رہے گا۔ صدر نے کہا کہ آئیے اس یومِ آزادی کو اپنی تاریخ کا ایک نیا باب بنا کر اور اپنے اختلافات سے بالاتر ہو کر ایک ایسے پاکستان کے لیے متحد ہوں جو انصاف، مساوات، ایمان اور خدمتِ خلق پر قائم ہو۔ وزیراعظم محمد شہبازشریف  نے یوم آزادی پر اپنے پیغام میں کہا کہ آج کے دن اللہ تعالی کے حضور سجدہ شکر ادا کرتے ہوئے پاکستان کے 78 سال مکمل ہونے پر قوم کو تہہ دِل سے مبارک پیش کرتا ہوں۔ بابائے قوم قائداعظم محمد علی جناح اور مفکر پاکستان علامہ محمد اقبال سمیت تحریک آزادی کے بلند ہمت، دور اندیش قائدین اور کارکنوں کو سلام پیش کرتا ہوں،  جنہوں نے بکھری ہوئی قوم کو ایک فکر، ایک مشن اورایک نصب العین پر نہ صرف متحد کیا بلکہ اپنی ولولہ انگیز سیاسی جدوجہد کے ذریعے تاریخ کا دھارا موڑ کر ایک الگ نظریاتی ریاست کے قیام کے ناممکن سمجھے جانے والے خواب کو شرمندہ تعبیر کردکھایا۔ انہوں نے کہاکہ گزرے 78 سال آزمائش آمیز سفر، اللہ پر کامل یقین اور تابناک مستقبل کی امید کی کہانی ہے جس میں ہمیں بطورِ قوم کئی مشکل مراحل سے گزرنا پڑا لیکن اس سب کے باوجود پاکستان نے ہر شعبے میں کامیابیوں اور کامرانیوں کے کئی سنگ میل عبور کئے ہیں۔ معیشت سے کھیل کے میدانوں اور دفاع سے آئی ٹی تک، ہر شعبے میں، پاکستانیوں نے اپنی بے مثال عزم وہمت اور علم وہنر کے باب رقم کئے ہیں،وزیراعظم نے کہاکہ  بھارت کی مسلط کردہ جنگ، 6 سے 10 مئی 2025 کے دوران، معرکہ حق میں پاکستان کی عظیم فتح نے 78 ویں یوم آزادی کی نہ صرف اہمیت میں اضافہ کردیا ہے بلکہ پاکستانیوں کے دل میں ایک نئی امنگ اور جذبہ بھی بیدار کردیا ہے جس سے جشن آزادی کی خوشیاں دوبالا ہوگئی ہیں۔  اللہ تعالی کے فضل سے بھارت کے اس  حملے میں، اپنی تابندہ روایات دہراتے ہوئے ہماری بہادر مسلح افواج نے بنیان مرصوص بن کر دشمن کے غرور کا بت پاش پاش کردیا، ہمارے شیروں اور شاہینوں کی عسکری مہارت، بہادری اور جذبہ ایمانی نے دشمن کو چند گھنٹوں میں ہی گھٹنے ٹیکنے پر مجبور کردیا۔ انہوں نے کہاکہ آزادی کی ٹھنڈی چھاوں فراہم کرنے والے شہدا کو خراج عقیدت پیش کرتے ہوئے ان کے درجات کی بلندی کی دعا کرتے ہیں۔  یہ صرف عسکری فتح نہیں تھی، بلکہ دوقومی نظریے کی صداقت کی بھی جیت تھی جو وطنِ عزیز کی اساس ہے۔ ہم اپنے دفاع اور آبی وسائل سمیت قومی مفادات کے تحفظ کے لئے اسی جذبے سے آگے بڑھتے رہیں گے۔ شہباز شریف نے کہاکہ پاکستان کی سالمیت، دفاع اور تحفظ کے لئے اپنے عزم کا اعادہ کرتے ہوئے امن پسند قوم کے طورپر یہ بھی دہراتے ہیں کہ ہم خطے اور دنیا میں پرامن بقائے باہمی اور بات چیت کے سفارتی ذرائع سے مسائل کے حل پر یقین رکھتے ہیں۔ بھارت کو بھی اسی جذبے سے جموں وکشمیر سمیت تمام تنازعات کے حل کی طرف آنا ہوگا۔انہوں نے کہاکہ حکومت نے عام شہری کی فلاح و بہبود کو ترجیح دی ہے۔ برسوں کے مسلسل بوجھ کے بعد بجلی کی قیمتوں میں خاطر خواہ  کمی کی گئی ہے، جس سے عوام  اور صنعتوں کو یکساں طور پر ریلیف مل رہا ہے۔انہوں نے کہاکہ آج میں بطور وزیراعظم  بالخصوص اس عزم کا بھی اعادہ کرتا ہوں کہ حکومت اپنے تمام تر وسائل بروئے کار لاتے ہوئے پاکستان کو جدید ٹیکنالوجی اور عصر حاضر کے نئے معاشی و صنعتی تقاضوں سے ہم آہنگ کرنے کے لیے ہمہ وقت کوشاں ہیں۔تمام پالیسیوں اور پروگراموں سے قطع نظر پاکستان کے عروج کے پیچھے اصل قوت ہمارا اتحاد  ہے۔انہوں نے کہاکہ  دفاع کی طرح معاشی طورپر ناقابل تسخیر ہونا، قومی دفاع اور سالمیت کا ایک بہت بڑی ضرورت ہے جس کے لئے ہم سب کو معرکہ حق اور تحریک پاکستان جیسے پرخلوص جذبے کی ضرورت ہے۔ وزیراعظم نے کہاکہ میں تمام سیاسی جماعتوں اور تمام طبقات کو آج کے دِن پرخلوص پیشکش کرنا چاہتا ہوں کہ اتحاد واتفاق سے قومی مفادات کے تحفظ اور فروغ کے لئے اشتراک عمل کی راہ اپنائیں تاکہ ہم بحیثیت مجموعی قوم کو ترقی وخوش حالی کی اس منزل سے ہم کنار کریں جس کا خواب قیام پاکستان کی صورت ہمارے اسلاف اور شہیدوں نے دیکھا تھا۔

#/S