ایران، ترکی، آسٹریلیا، نیدرلینڈ اور سعودی عرب کی اسلام آباد کچہری میں خود کش دھماکے کی شدید الفاظ میں مذمت
چین کی اسلام آباد میں خودکش دھماکے کی شدید مذمت، زخمیوں کی جلد صحت یابی کے لیے دعا
اسلام آباد ( ویب نیوز ) ایران، ترکی، آسٹریلیا، نیدرلینڈ اور سعودی عرب نے اسلام آباد کچہری میں خود کش دھماکے کی شدید الفاظ میں مذمت کی ہے۔ ایرانی سفارتخانے نے اپنے بیان میں کہا کہ یہ دہشتگردی بزدل عناصر کی خطرناک سازش ہے، یہ سازش خطے کو غیر مستحکم کرنے اور خطے کی پائیدار ترقی کے اہداف کے حصول میں رکاوٹیں ڈالنے کی کوشش ہے۔ بیان میں کہا گیا ہے کہ اس خطرناک رجحان کا مقابلہ کرنے کے لیے ضروری ہے کہ تمام ممالک مشترکہ کوششیں کریں، غم کی گھڑی میں پاکستانی حکومت اور عوام سے دلی تعزیت کا اظہار کرتے ہیں۔ ترک وزارتِ خارجہ نے اپنے بیان میں کہا ہے کہ اسلام آباد میں خود کش حملے کی بھرپور مذمت کرتے ہیں، ترکیہ دہشتگردی کے خلاف پاکستان کے ساتھ کھڑا ہے۔دھماکہ قابلِ مذمت اور انسانیت دشمن عمل ہے۔دوسری جانب آسٹریلوی ہائی کمشنر نے بھی اسلام آباد خود کش حملے پر پاکستان سے اظہارِ یکجہتی کیا ہے اور دھماکے کے متاثرین اور ان کے اہلِ خانہ سے اظہارِ تعزیت کیا ہے۔آسٹریلوی ہائی کمیشن نے عوام کے تحفظ کے لیے سرگرم اداروں اور اہلکاروں کو خراجِ تحسین پیش کیا ہے۔فرانس اور نیدر لینڈ نے بھی اسلام آباد خود کش حملے کی شدید مذمت کی ہے اور پاکستانی حکومت اور عوام سے اظہار تعزیت کی ہے۔پاکستان میں سعودی عرب کے سفیر بن سعید المالکی نے اپنے بیان میں کہا ہے کہ اسلام آباد میں دہشتگرد حملے کی شدید مذمت کرتے ہیں، انہوں نے کہا کہ دھماکے میں جان نقصان ہوا اور متعدد افراد زخمی ہوئے، ہر قسم کی دہشتگردی کی مذمت کرتے ہیں اور اس افسوسناک واقعے پر پاکستان کے عوام سے اظہار تعزیت کرتے ہیں۔ پاکستان میں چینی سفارتخانہ نے اسلام آباد میں ہونے والے خودکش دھماکے کی شدید مذمت کی اور کہا کہ جاں بحق ہونے والوں کے ساتھ ہمدردی کا اظہار کرتے ہیں۔چینی سفارت خانہ پاکستان کا کہنا تھا کہ زخمیوں سے دلی ہمدردی کا اظہار کرتے ہیں، زخمیوں کی جلد صحت یابی کے لیے دعا گو ہیں۔
