اسلام آباد (ویب ڈیسک)
وزیرِ اعظم عمران خان کے نمائندہ خصوصی علامہ طاہر اشرفی نے کورونا وائرس کی تیزی سے پھیلتی ہوئی تیسری لہر کے حوالے سے کہا ہے کہ رمضان المبارک میں کوئی مسجد بند نہیں کریں گے۔ ایک نجی ٹی وی سے گفتگو کرتے ہوئے علامہ طاہر اشرفی نے کہا کہ مساجد کھلی رہیں گی، جہاں نمازِ تراویح کی ادائیگی بھی ہو گی، تاہم کورونا وائرس کی وبا کے سلسلے میں احتیاطی تدابیر پر سب کو عمل کرنا ہے۔علامہ طاہر اشرفی نے بتایا کہ حکومت تمام مذہبی جماعتوں سے رابطے میں ہے، کورونا وائرس کی ایس او پیز پر سب سے زیادہ عمل مساجد میں ہی ہوا ہے۔انہوں نے عوام پر زور دیتے ہوئے مزید کہا کہ کورونا وائرس کی ویکسین لگوانا چاہیئے، کورونا ویکسین نہ لگوانے کی باتیں پاگل پن ہیں۔ وزیرِ اعظم عمران خان کے نمائندہ خصوصی علامہ طاہر اشرفی کا یہ بھی کہنا ہے کہ یہ فتوی بھی دیا گیا ہے کہ مخیر حضرات خرید کر مستحق لوگوں کو ویکسین لگوائیں۔
