بھارتی وزیر خارجہ کے حالیہ اعتراف نے اس کی اصلیت عیاں کر دی، ایف اے ٹی ایف کے نوٹس میں لایا جائے گا
اسلام آباد (ویب ڈیسک)
دفتر خارجہ کے ترجمان زاہد حفیظ چودھری نے کہا ہے کہ بھارتی وزیر خارجہ جے شنکر کا ایف اے ٹی ایف میں پاکستان مخالف منفی کردا ر کا اعتراف ہمارے دیرینہ موقف کی تائید ہے،بھارتی وزیر خارجہ کے بیان نے اس کی اصلیت عیاں کر دی ۔ترجمان دفتر خارجہ نے اپنے جاری ایک بیان میں کہا ہے کہ ایف اے ٹی ایف میں بھارتی منفی کردار سے متعلق پاکستان کے موقف کو درست ثابت کیا اور بھارت ایف اے ٹی ایف کو سیاست کا شکار کر کے اس کے کردار کو گھٹا رہا ہے۔انہوں نے کہا کہ بھارتی بیان اہم تکنیکی فارم کو تنگ نظر سیاسی مقاصد کے لیے استعمال کرنے کو ثابت کرتا ہے۔ ایکشن پلان پر عمل کے دوران پاکستان تعمیری انداز میں ایف اے ٹی ایف سے رابطے میں ہے۔ انہوں نے کہا کہ پاکستان کی پیشرفت پر بھارت بھونڈے ذرائع سے شک ظاہر کرنے کا ہر ممکن طریقہ اختیار کرتا ہے جبکہ ماضی میں پاکستان بار بار بھارت کے نقلی کردار کو عالمی برادری کے سامنے لاتا رہا ہے۔انہوں نے کہا کہ بھارت کے حالیہ اعتراف کو بھی ایف اے ٹی ایف کے نوٹس میں لایا جائے گا اور پاکستان مناسب ایکشن کے لیے صدر ایف اے ٹی ایف سے رابطے پر غور کر رہا ہے، ایف اے ٹی ایف کے معاملے پر بات کرتے ہوئے ترجمان دفتر خارجہ نے کہا کہ ہم ایف اے ٹی ایف پر زور دیتے ہیں کہ اس معاملے کو دیکھے جبکہ پاکستان کی اینٹی منی لانڈرنگ اور سی ایف ٹی سے متعلق پیشرفت ایف اے ٹی ایف نے تسلیم کیا۔انہوں نے کہا کہ دھوکے بازی سے پاکستان پر دبائو ڈالنے کی بھارتی کوشش ہمیشہ ناکام رہی ہے۔واضح رہے کہ بھارتی وزیر خارجہ جے شنکر نے اعتراف کیا ہے کہ بھارت کی کوشش سے پاکستان فیٹف کی گرے لسٹ میں رہا اور ہماری ہی کوششوں سے پاکستان ایف اے ٹی ایف کے ریڈار پر آیا تھا۔
