10ایرانی شہریوں کے غیر قانونی شناختی کارڈ بنانے کا انکشاف،نادرا کے چند ملازمین برطرف
ایرانی شہریوں نے غیر قانونی طریقے سے 2013 سے جون 2021 کے درمیان شناختی کارڈ بنوائے
عہدہ سنبھالنے کے بعد 136 ملازمین کے خلاف کارروائی کرتے ہوئے معطل کیا،چیئر مین نادرا طارق ملک
لاہور (ویب ڈیسک)
پاکستان میں غیرقانونی طور پر داخل ہونیوالے 10 ایرانی شہریوں کے غیر قانونی شناختی کارڈ بنانے کا انکشاف ہوا ہے۔ ترجمان نادرا کی طرف سے بتایا گیا ہے کہ ان لوگوں نے غیر قانونی طریقے سے 2013 سے جون 2021 کے درمیان شناختی کارڈ بنوائے، نادرا نے رجسٹریشن کی نظرثانی شدہ پالیسی چند ہفتے پہلے لاگو کی، نئی پالیسی میں اس طرح کی سرگرمیوں کے تدارک کے لئے سخت اقدامات کئے گئے ہیں۔ترجمان کے مطابق غیر قانونی شناختی کارڈ بنوانے میں مدد کرنے والے چند ملازمین کو برطرف کیا جا چکا ہے، غیرقانونی شناختی کارڈ بنانے والوں کے خلاف مزید تحقیقات جاری ہیں۔ نادرا میں احتساب کا عمل قیادت کی سطح سے شروع کیا گیا ہے۔چیئر مین نادرا طارق ملک نے کہا کہ عہدہ سنبھالنے کے بعد 136 ملازمین کے خلاف کارروائی کرتے ہوئے معطل کیا، 113 ملازمین میں سے 90 کے خلاف انکوائریز کا آغاز کیا گیا، 267 کو چارج شیٹ کیا گیا اور یہ کارروائی جاری ہے۔
