ڈاکٹر عبدالقدیر کی آخری دستخط شدہ درخواست پر فریقین کو نوٹس جاری
وزارتِ داخلہ اور وزارتِ صحت سے 3 ہفتوں میں جواب جمع کرانے کی ہدایت
عدالت نے وزارتِ داخلہ سے میڈیکل کے طلبا کیخلاف درج مقدمات کا ریکارڈ بھی طلب کر لیا
این ایل ای ٹیسٹ کیسے لئے جا رہے ہیں؟ پراسس سے آگاہ کیا جائے،عدالت
اسلام آباد( ویب نیوز)اسلام آباد ہائی کورٹ نے ایٹمی سائنسدان ڈاکٹر عبدالقدیر خان کی آخری دستخط شدہ درخواست پر سماعت کرتے ہوئے فریقین کو نوٹس جاری کر دیئے اور 3 ہفتوں میں جواب طلب کر لیا۔منگل کو پی ایم سی کے امتحانات اور طلبا پر تشدد کے خلاف اسلام آباد ہائی کورٹ کے جسٹس بابر ستار نے ڈاکٹر عبدالقدیرخان کی آخری دستخط شدہ درخواست پر سماعت کی۔جسٹس بابر ستار نے سماعت کے دوران ریمارکس دیئے کہ وزارتِ داخلہ اور وزارتِ صحت 3 ہفتوں میں جواب جمع کرائیں، عدالت نے وزارتِ داخلہ سے میڈیکل کے طلبا کے خلاف درج مقدمات کا ریکارڈ بھی طلب کر لیا۔ عدالت نے استفسار کیا کہ کتنے طلبا تشدد سے زخمی اور کتنے گرفتار ہوئے؟ ریکارڈ پیش کیا جائے، این ایل ای ٹیسٹ کیسے لئے جا رہے ہیں؟ پراسس سے آگاہ کیا جائے۔واضح رہے کہ ایڈووکیٹ وقاص ملک نے عبدالقدیر خان کی درخواست کردہ آخری درخواست گزشتہ روز ان کی وفات کے بعد خود دائر کی تھی۔
