اسلام آباد (ویب ڈیسک)
کابینہ کی اقتصادی رابطہ کمیٹی (ای سی سی) نے یوٹیلیٹی اسٹورز پر 5 اشیائے ضروریہ کی قیمتوں پر سبسڈی جاری رکھنے کی منظوری دے دی ہے۔ اقتصادی رابطہ کمیٹی کی منظوری کے تحت یوٹیلٹی اسٹورز پر آٹا، گھی، چینی، چاول اور دالوں پر سبسڈی 24 فروری سے 31 مارچ تک برقرار رہے گی جبکہ کمیٹی نے افغانستان اور ایران کے ساتھ سرحدی تجارت (بارڈر ٹریڈ) معاہدے کے ضوابط کی اجازت دیدی ہے۔اجلاس میں چینی کی قیمتوں میں اضافہ روکنے کیلئے چینی کے ذخائر کو تقویت دینے کی منظوری دی گئی اور وفاقی حکومت کی جانب سے 3 لاکھ اور پنجاب اور سندھ 2 لاکھ میٹرک ٹن چینی خریدنے پر اتفاق کیا گیا۔علاوہ ازیں اجلاس میں افغانستان کو 50 ہزار میٹرک ٹن گندم کی فراہمی کی سمری واپس لے لی گئی جبکہ پاسکو کو 65 ارب کی کریڈٹ لمٹ پر 12 لاکھ ٹن گندم کی خریداری کا ہدف دیا گیا، جس کے تحت پاسکو 1950 روپے فی 40 کلوگرام کی شرح سے گندم خریدے گا۔وزارت اقتصادی امور کیلئے 68.40 کروڑ کی کی پہلی قسط کی منظوری بھی دے دی، سندھ میں اقتصادی ترقی کے پلان کے لئے دو کروڑ روپے کی گرانٹ اور وزارت ہاوسنگ اینڈ ورکس کیلئے پی ایس ڈی پی سے 20 کروڑ روپے کی گرانٹ اور نیشنل انسٹی ٹیوٹ آف ہیلتھ کیلئے 45 کروڑ کی سپلیمنٹری گرانٹ کی منظوری دی گئی۔
