وزیر ہوا بازی کا دعویٰ غلط، جدہ میں پی آئی اے کا آپریشن تاحال سخت متاثر
آسلام آباد ( ویب نیوز )
وفاقی وزیر ہوا بازی سعد رفیق کے دعوے دھرے رہ گئے ہیں جدہ کے نارتھ ٹرمینل پر پی آئی اے کا فضائی آپریشن بری طرح سے متاثر ہوا ہے۔
اے آر وائی نیوز کے مطابق جدہ کے نارتھ ٹرمینل پر قومی ایئر لائن کا فضائی آپریشن بری طرح متاثر ہوا ہے اور پی آئی اے 4 سے زائد پروازیں 5 گھنٹے سے زائد تاخیر کا شکار ہیں جس کے باعث عمرہ ادائیگی کے بعد وطن واپسی کیلیے ایئرپورٹ پر موجود پاکستانی مسافروں کو شدید مشکلات کا سامنا کرنا پڑ رہا ہے۔
ایئرپورٹ ذرائع کے مطابق جدہ سےکراچی آنے والی پرواز پی کے9742 ساڑھے5 گھنٹے جب کہ اسلام آباد آنے والی پرواز پی کے6746 پانچ گھنٹے تاخیرکا شکار ہیں۔
پروازوں کی گھنٹوں تاخیر اور ایئرپورٹ پر رش کے باعث پی آئی اے کے مسافر رُل گئے ہیں جب کہ ذرائع نے بتایا ہے کہ مسافروں کا اس وقت وہاں کوئی پرسان حال نہیں ہے اور قومی ایئرلائن کا عملہ بھی وہاں سے غائب ہوگیا ہے۔
واضح رہے کہ جدہ ائیرپورٹ پر رش اور پروازوں کی تاخیر کے معاملے پر وزیر ہوا بازی سعد رفیق نے سماجی رابطوں کی ویب سائٹ پر اپنے ٹوئٹ میں دعویٰ کیا تھا کہ جدہ ائیرپورٹ پر پاکستانی پی آئی اے عملہ اور سفارتخانہ متحرک ہے اور وہاں سے مسافروں کی واپسی کا آپریشن معمول پر آچکا ہے۔
