عالمی منڈی میں خام تیل کی قیمت میں اضافہ
امریکی خام تیل کی فی بیرل قیمت 123 ڈالر، برطانوی کی فی بیرل قیمت 124 ڈالر تک پہنچ گئی
رواں سال خام تیل کی قیمتوں میں 42 فیصد تک اضافہ ہو گا ،عالمی بینک
نیو یارک (ویب نیوز)
عالمی منڈی میں خام تیل کی قیمت میں اضافہ ہو گیا۔ غیرملکی خبررساں ادارے کے مطابق مریکی خام تیل کی فی بیرل قیمت 123 ڈالر، برطانوی خام تیل کی فی بیرل قیمت 124 ڈالر تک پہنچ گئی۔عالمی بینک نے خدشہ ظاہر کیا ہے کہ رواں سال خام تیل کی قیمتوں میں 42 فیصد تک اضافہ ہو گا جس سے دیگر اشیا 18 فیصد تک مہنگی ہو جائیں گی۔ عالمی بینک کے صدر ڈیوڈ مالپاس نے کہا کہ یوکرین جنگ کی وجہ سے بہت سے ممالک کیلئے کساد بازاری سے بچنا مشکل ہو جائے گا جبکہ اجناس کی قلت کی وجہ سے دنیا بھرمیں قحط پھیلنے کا بھی خدشہ ہے۔ عالمی بینک نے عالمی شرح نمو 4.1 فیصد سے کم کرکے 2.9 فیصد کر دی ۔دوسری طرف عالمی مارکیٹ میں ملائیشین پام آئل کی فی ٹن قیمت میں 4 ڈالر، 32 سینٹ کی کمی دیکھی گئی جس کے بعد فی ٹن پام آئل ایک ہزار، 533 ڈالر کا ہو گیا۔عالمی مارکیٹ میں سونا 2 ڈالر کی کمی سے ایک ہزار، 854 ڈالر فی اونس ہو گیا۔ فی اونس چاندی 39 سینٹ سستی ہو کر 22ڈالر،5سینٹ کی ہو گئی۔ پلاٹینم 5 ڈالر کمی سے ایک ہزار، 5ڈالر اور پلاڈیئم 4ڈالر، 30سینٹ کمی سے ایک ہزار، 933 ڈالر فی اونس ہو گئی .
