لاہور (ویب نیوز)
صوبائی دارالحکومت سمیت پنجاب کے مختلف علاقے شدید دھند کی لپیٹ میں رہے جبکہ حد نگاہ بھی نہ ہونے کے برابر رہی جس کے باعث اہم شاہراہوں سمیت موٹرویز کو متعدد مقامات سے بند کر دیا گیا ۔ترجمان موٹرویز پولیس کے مطابق موٹر وے ایم ٹو کو لاہور سے شیخوپورہ ، لاہور ملتان موٹر وے ایم تھری کو فیض پور سے رجانہ، موٹر وے ایم فور کو پنڈی بھٹیاں سے فیصل آباد اور موٹروے ایم الیون کو لاہور سے سیالکوٹ تک شدید دھند کے باعث بند کر دیا گیا ۔ترجمان موٹروے پولیس نے شہریوں کو غیر ضروری سفر سے گریز کرنے کی اپیل کرتے ہوئے کہا ہے کہ ڈرائیور حضرات تیز رفتاری سے پرہیز کریں اور اگلی گاڑی سے مناسب فاصلہ رکھیں۔دوسری جانب حد نگاہ کم ہونے کے باعث جی ٹی روڈ کومتعدد مقامات اور رنگ روڈپرٹریفک روانی متاثررہی۔
