- یہ غلط طریقہ ہے کہ شیڈول آنے کے بعد یونین کونسلز کی تعداد میں اضافہ کردیا جائے،چیف جسٹس عامرفاروق
اسلام آباد (ویب نیوز)
اسلام آباد ہائیکورٹ نے وفاقی دارالحکومت میں 120 روز کے اندر بلدیاتی انتخابات منعقد کروانے کا حکم دے دیا۔جمعرات کو اسلام آباد ہائیکورٹ میں بلدیاتی انتخابات کے انعقاد سے متعلق انٹرا کورٹ اپیلوں پر سماعت ہوئی جس میں ڈی جی لاء الیکشن کمیشن نے کہا کہ انتخابات کرانے کیلئے الیکشن کمیشن کو 120 دن درکار ہوتے ہیں، 125 یونین کونسلز کی حلقہ بندیاں کرکے وہاں شیڈول جاری کیا جائے گا۔چیف جسٹس اسلام آباد ہائیکورٹ نے کہا کہ یہ غلط طریقہ ہے کہ شیڈول آنے کے بعد یونین کونسلز کی تعداد میں اضافہ کردیا جائے، مستقبل میں اگر اضافہ کرنا بھی ہو تو شیڈول آنے سے پہلے کریں، ہم ان اپیلوں کو نمٹا دیتے ہیں اور آبزرویشن جاری کردیں گے۔چیف جسٹس نے کہا کہ ہم ایک آرڈر پاس کردیتے ہیں کہ آئندہ انتخابات کیلئے یونین کونسلز کی تعداد میں اضافہ نہیں کیا جائے گا۔اسلام آباد ہائیکورٹ نے درخواستیں نمٹاتے ہوئے متعلقہ اداروں کو بلدیاتی الیکشن کے انتظامات کرنے اور 120 روز میں انتخابات منعقد کرانے کا حکم جاری کر دیا۔
